નવી દિલ્હી: પીએમ મોદીએ દિલ્હીમાં બ્રિક્સ બિઝનેસ ફોરમના નેતાઓને સંબોધતા જણાવ્યું હતું કે વૈશ્વિક અનિશ્ચિતતાઓ વચ્ચે ભારત વિકાસ અને સ્થિરતાનો ભરોસો આપી રહ્યો છે. તેમણે વધુમાં જણાવ્યું કે  ભારતના બ્રિક્સ અધ્યક્ષપદનો વિષય 'સ્થિતિસ્થાપકતા, નવીનતા, સહકાર અને ટકાઉપણું માટે નિર્માણ છે. જેને ભારતે  છેલ્લા 12 વર્ષોમાં તેની આર્થિક અને વેપાર નીતિઓનો પાયો બનાવ્યો છે.

સપ્લાય ચેઇનને વધુ વૈવિધ્યસભર અને વિશ્વસનીય બનાવી

તેમણે સ્થિતિસ્થાપકતા પર પ્રકાશ પાડતા જણાવ્યું કે  ભારતે ઊર્જાથી લઈને ટેકનોલોજી સુધીના વિવિધ ક્ષેત્રોમાં સપ્લાય ચેઇનને વધુ વૈવિધ્યસભર અને વિશ્વસનીય બનાવી છે.આ સ્થિતિસ્થાપકતા ભારતને વૈશ્વિક અનિશ્ચિતતાઓ વચ્ચે પણ વૃદ્ધિ અને સ્થિરતાની ખાતરી આપવા દે છે.

માળખાગત સુવિધાઓનો ઝડપથી વિસ્તાર

પીએમ મોદીએ જણાવ્યું હતું કે ભારત રોડ, રેલ્વે, પોર્ટ અને એરપોર્ટ સહિત તેના માળખાગત સુવિધાઓનો ઝડપથી વિસ્તાર કરી રહ્યું છે. તેમજ શિપબિલ્ડીંગ, સેમિકન્ડક્ટર, ક્વોન્ટમ ટેકનોલોજી, મહત્વપૂર્ણ ખનિજો અને બાયોટેકનોલોજી જેવા વ્યૂહાત્મક ક્ષેત્રોમાં નવી ક્ષમતાઓ વિકસાવવામાં આવી રહી છે. 

ભારતે યુપીઆઈ પેમેન્ટ અને ડિજિટલ વ્યવહારોને નવી ગતિ

આ બધા વચ્ચે ભારતે યુપીઆઈ પેમેન્ટ અને ડિજિટલ વ્યવહારોને નવી ગતિ આપી છે. આજે  વિશ્વની 50 ટકા રીઅલ-ટાઇમ ચુકવણીઓ આ ટેકનોલોજી દ્વારા કરવામાં આવે છે.

ભારતે લગભગ 40 દેશો સાથે મુક્ત વેપાર કરાર કર્યા 

આ ઉપરાંત હાલના સમયમાં  જ્યારે વૈશ્વિક સ્તરે વેપાર અવરોધો વધી રહ્યા છે, ત્યારે ભારત આર્થિક પુલ બનાવી રહ્યું છે. તેમણે ઉલ્લેખ કર્યો કે વર્ષ 2014 થી ભારતે લગભગ 40 દેશો સાથે મુક્ત વેપાર કરાર કર્યા છે. અમારો અભિગમ વેપાર અવરોધો ઘટાડવા અને વ્યાપારિક તકો વધારવા પર કેન્દ્રિત છે. 

ભારતના બ્રિક્સ અધ્યક્ષપદ હેઠળ અનેક નવા ક્ષેત્રો ખૂલ્યા 

પીએમ મોદીએ ઉમેર્યું કે ભારતના બ્રિક્સ અધ્યક્ષપદ હેઠળ, કૃષિ, આરોગ્ય, કૌશલ્ય અને સ્માર્ટ ગ્રીડ જેવા ક્ષેત્રોમાં નવા સહયોગ નેટવર્ક સ્થાપિત થયા છે.
તેમજ  સ્ટાર્ટઅપ્સ અને MSMEને બજારો અને નાણાં સાથે જોડવા માટે બ્રિક્સ ઇન્ક્યુબેટર નેટવર્ક, બ્રિક્સ MSME પોર્ટલ અને બ્રિક્સ સ્ટાર્ટઅપ ઇનોવેશન ફંડ જેવી પહેલો શરૂ કરવામાં આવી છે. તેમણે જણાવ્યું હતું કે બધા રાષ્ટ્રો રોકાણ અને પ્રતિભાના આદાનપ્રદાનને વેગ આપવા આ માળખાનો લાભ લઈ શકે છે.