નવી દિલ્હી: ઓગસ્ટ મહિના દરમિયાન ઔદ્યોગિક ઉત્પાદન સૂચકાંકે વાર્ષિક ધોરણે ૮.૦ ટકાનો વૃદ્ધિ દર નોંધાવ્યો છે, જે અગાઉના મહિનામાં ૭.૪ ટકા હતો. આ સાથે ઉત્પાદન ક્ષેત્રમાં ૯.૦ ટકા અને વીજળી તથા ગેસ પુરવઠા ક્ષેત્રમાં ૧૨.૩ ટકાની મજબૂત વૃદ્ધિનો ટેકો મળ્યો છે. એમ નેશનલ સ્ટેટિસ્ટિક્સ ઓફિસે જણાવ્યું હતું.
નવી શ્રેણી હેઠળ 'ઔદ્યોગિક ઉત્પાદન સૂચકાંક' (આઈઆઈપી)ના આંકડાનો આ પાંચમો માસિક અહેવાલ છે. આંકડા દર્શાવે છે કે ખાણકામ અને ક્વોરીંગ ક્ષેત્રમાં ઓગસ્ટમાં ૫.૬ ટકાનો ઘટાડો થયો હતો, જ્યારે એક વર્ષ અગાઉ તેમાં ૧૫.૮ ટકાની વૃદ્ધિ નોંધાઈ હતી. ઓગસ્ટ ૨૦૨૫માં આઈઆઈપી વૃદ્ધિ દર ૪.૭ ટકા હતો.
જુલાઈ માટે આઈઆઈપીનો સુધારેલો અંદાજ ૭.૪ ટકા રહ્યો છે; અગાઉ જાહેર કરાયેલા ૬.૭ ટકાના કામચલાઉ અંદાજની સરખામણીમાં આ આંકડામાં ઉપરની તરફ સુધારો કરવામાં આવ્યો છે.
ચાલુ નાણાકીય વર્ષમાં એપ્રિલથી ઓગસ્ટ દરમિયાન આઈઆઈપી વૃદ્ધિ દર ૬.૭ ટકા રહ્યો છે, જે એક વર્ષ અગાઉ ૪.૨ ટકા હતો. ઉત્પાદન ક્ષેત્રની વાત કરીએ તો, ૨૩ ઉદ્યોગ જૂથમાંથી ૧૮ જૂથોએ ગયા વર્ષના સમાન મહિનાની સરખામણીમાં ઓગસ્ટ ૨૦૨૬માં હકારાત્મક વૃદ્ધિ નોંધાવી છે.
ઓગસ્ટ ૨૦૨૬ના મહિના માટે હકારાત્મક યોગદાન આપનારા ટોચના ત્રણ ક્ષેત્રમાં 'મોટર વાહનો, ટ્રેલર્સ અને સેમી-ટ્રેલર્સનું ઉત્પાદન' (૨૫.૨ ટકા), 'ઇલેક્ટ્રિકલ સાધનોનું ઉત્પાદન' (૩૦.૯ ટકા) અને 'અન્ય પરિવહન સાધનોનું ઉત્પાદન' (૨૫.૩ ટકા) નો સમાવેશ થાય છે.
'અન્ય પરિવહન સાધનોના ઉત્પાદન' જૂથમાં, ટુ-વ્હીલર્સ (મોટરસાયકલ/સ્કૂટર), રેલવે રોલિંગ સ્ટોક/ભાગો, જાળવણી અથવા સેવા માટેના વાહનો અને મોટરસાયકલ/મોપેડ તથા સાઇડકારના ભાગો અને એસેસરીઝ જેવી વસ્તુઓએ વૃદ્ધિમાં નોંધપાત્ર યોગદાન આપ્યું છે.
ઉપયોગ-આધારિત વર્ગીકરણ મુજબ, ઓગસ્ટ ૨૦૨૬ના મહિના માટે સૂચકાંકો પ્રાથમિક ચીજવસ્તુઓ માટે ૧૧૧.૮, મૂડીગત ચીજવસ્તુઓ માટે ૧૪૦.૭, મધ્યવર્તી ચીજવસ્તુઓ માટે ૧૩૧.૮ અને માળખાગત સુવિધા/બાંધકામની ચીજવસ્તુઓ માટે ૧૩૨.૫ રહ્યા છે. વધુમાં, ટકાઉ ગ્રાહક ચીજવસ્તુઓ અને બિન-ટકાઉ ગ્રાહક ચીજવસ્તુઓ માટેના સૂચકાંકો અનુક્રમે ૧૨૯.૪ અને ૧૧૪.૩ રહ્યા હતા.
ઓગસ્ટ ૨૦૨૫ની સરખામણીમાં ઓગસ્ટ ૨૦૨૬માં ઉપયોગ-આધારિત વર્ગીકરણ મુજબ આઈઆઈપી સંબંધિત વૃદ્ધિ દરો આ મુજબ છે: પ્રાથમિક ચીજવસ્તુઓમાં ૩.૫ ટકા, મૂડીગત ચીજવસ્તુઓમાં ૧૬.૯ ટકા, મધ્યવર્તી ચીજવસ્તુઓમાં ૧૩.૭ ટકા, માળખાગત સુવિધા/બાંધકામની ચીજવસ્તુઓમાં ૬.૪ ટકા, ટકાઉ ગ્રાહક ચીજવસ્તુઓમાં ૧૧.૧ ટકા અને બિન-ટકાઉ ગ્રાહક ચીજવસ્તુઓમાં ૨.૧ ટકા.
