અમદાવાદઃ આવનારી ચૂંટણીઓમાં જનરેશ ઝેડ-જેન ઝીના મત લેવા માટે તમામ પક્ષ કમર કસી રહ્યા છે ત્યારે જે યુવાનો- પહેલીવારના મતદારો પાસે મતદાર કાર્ડ નથી તેમની માટે આ સમાચાર મહત્વના છે.  ગુજરાત ૧૮-૧૯ વર્ષની વયના પ્રથમ વખતના મતદારો સહિત, મતદાર યાદીમાં નોંધણી કરાવવા માટે રાજ્યવ્યાપી ખાસ ઝુંબેશ ચલાવશે. આ ખાસ ઝુંબેશ રાજ્યભરના મતદાન મથકો પર ૧૧, ૧૮, ૨૫ ઓક્ટોબર અને ૧ નવેમ્બરના ચાર રવિવારના રોજ યોજાશે. મતદાર નોંધણી સંબંધિત અરજીઓ મેળવવા માટે નિયુક્ત અધિકારીઓ અને બૂથ લેવલ ઓફિસરો (બીએલઓ) સવારે ૧૦ થી સાંજે ૫ વાગ્યા સુધી મતદાન મથકો પર હાજર રહેશે.

આ પહેલ એવા રાજ્યો માટે ભારતના ચૂંટણી પંચના નિર્દેશો અનુસાર હાથ ધરવામાં આવી છે જ્યાં સ્પેશિયલ ઇન્ટેન્સિવ રિવિઝન (એસઆઈઆર) કવાયત પૂર્ણ થઈ ગઈ છે. ગુજરાતના મુખ્ય ચૂંટણી અધિકારી સંદીપ સાગલેએ તમામ જિલ્લા ચૂંટણી અધિકારીઓ અને કલેક્ટરોને મતદાર જાગૃતિ પ્રવૃત્તિઓ સાથે ઝુંબેશનું આયોજન કરવા અને જરૂરી વ્યવસ્થા કરવા નિર્દેશ આપ્યો છે.

વર્તમાન નોન-એસઆઈઆર સમયગાળા દરમિયાન, લાયક નાગરિકો મતદાર નોંધણી નિયમો, ૧૯૬૦ હેઠળ ફોર્મ ૬ સબમિટ કરીને મતદાર યાદીમાં પોતાના નામ ઉમેરી શકે છે.

આ અભિયાનના ભાગ રૂપે, ચૂંટણી નોંધણી અધિકારીઓ અને સહાયક ચૂંટણી નોંધણી અધિકારીઓ કોલેજો અને અન્ય શૈક્ષણિક સંસ્થાઓમાં મતદાર જાગૃતિ અંગેની પ્રવૃત્તિઓ હાથ ધરશે. બેનરો અને સ્થાનિક અખબારો દ્વારા પણ જાગૃતિ ફેલાવવામાં આવશે.

ચૂંટણી વિભાગે તમામ લાયક નાગરિકો, ખાસ કરીને 18 વર્ષની ઉંમર પૂર્ણ કરી ચૂકેલા યુવાનોને મતદાર યાદીમાં તેમના નામ નોંધાવવા માટે ખાસ ઝુંબેશનો ઉપયોગ કરવા અને મતદાર યાદી અપડેટ અને સમાવિષ્ટ રહે તે સુનિશ્ચિત કરવામાં મદદ કરવા વિનંતી કરી છે.