નવી દિલ્હીઃ ફુકેટથી દિલ્હી આવી રહેલી એર ઇન્ડિયાની ફ્લાઇટ AI-2379માં 4 ઓગસ્ટે ક્રૂઝ ફેજ દરમ્યાન અંદાજે 300 ફૂટની અચાનક ઉંચાઇમાં ઘટાડા બાદ એરક્રાફટ એક્સીડન્ટ ઇન્વેસ્ટિગેશન બ્યૂરો (AAIB) એ પોતાનો પ્રારંભિક રિપોર્ટ જાહેર કર્યો છે. આ રિપોર્ટનું એર ઇન્ડિયા મેનેજમેન્ટે પણ સ્વાગત કર્યું છે.
અંતિમ રિપોર્ટના આવવાની છે રાહ
અહેવાલ મુજબ, પાયલોટ-ઇન-કમાન્ડ (PIC) ના કન્ફર્મેટી ટેસ્ટ (પુષ્ટિકરણ પરીક્ષણ) માં સાયકો-એક્ટિવ પદાર્થ માટે નોન-નેગેટિવ પરિણામ આવ્યું છે. એએઆઈબી (AAIB) એ આને ગંભીર ચિંતાનો વિષય ગણાવીને ડીજીસીએ (DGCA) ને પ્રાથમિકતાના ધોરણે યોગ્ય કાર્યવાહી કરવાની ભલામણ કરી છે. તકનીકી અને અન્ય પાસાઓની વિગતવાર તપાસ હજુ ચાલુ છે.
આ પ્રારંભિક અહેવાલ આંતરરાષ્ટ્રીય નાગરિક ઉડ્ડયન સંગઠન (ICAO) ના દિશાનિર્દેશો અનુસાર જારી કરવામાં આવ્યો છે. તપાસ પ્રક્રિયા ચાલી રહી છે અને અંતિમ અહેવાલ બાદમાં પ્રકાશિત કરવામાં આવશે.
ફ્લાઇટ અચાનક 300 ફૂટ નીચે આવી ગઈ હતી
4 ઓગસ્ટે એર ઇન્ડિયાનું એરબસ A320 વિમાન (રજિસ્ટ્રેશન VT-EXO) ફુકેટથી દિલ્હી જઈ રહ્યું હતું. ક્રૂઝ (ઉડાન) દરમિયાન અચાનક ઊંચાઈમાં લગભગ 300 ફૂટનો ઘટાડો થયો હતો. આ ઘટનામાં ઓછામાં ઓછા 17 મુસાફરો અને ક્રૂ સભ્યોને ઇજાઓ થઈ હતી, જેમાં કેટલાકને કરોડરજ્જુ (સ્પાઇનલ) અને ગરદનની ઇજાઓ પણ સામેલ છે.
AAIB એ ગંભીર ઘટના ગણાવી
AAIB (એરક્રાફ્ટ એક્સિડન્ટ ઇન્વેસ્ટિગેશન બ્યુરો) દ્વારા આ ઘટનાને ગંભીર ઘટના (સીરિયસ ઇન્સિડન્ટ) તરીકે વર્ગીકૃત કરવામાં આવી છે. અગાઉના કેટલાક અહેવાલોમાં ટર્બ્યુલન્સનો ઉલ્લેખ હતો, પરંતુ પછીની તપાસમાં ટેકનિકલ મુદ્દાઓ અને હવે પાઇલોટના પરીક્ષણ પરિણામ પર પણ ધ્યાન કેન્દ્રિત કરવામાં આવી રહ્યું છે. AAIB નો વિગતવાર તપાસ અહેવાલ હજી આવવાનો બાકી છે.
એર ઇન્ડિયાએ AAIB ના અહેવાલ પર શું કહ્યું...
એર ઇન્ડિયા દ્વારા જારી કરવામાં આવેલા નિવેદનમાં કહેવામાં આવ્યું છે કે અમે વિમાન દુર્ઘટના તપાસ બ્યુરો (AAIB) દ્વારા જારી કરાયેલા પ્રારંભિક અહેવાલનું સ્વાગત કરીએ છીએ અને સંબંધિત ઓપરેશનલ, જાળવણી (મેન્ટેનન્સ) અને તકનીકી રેકોર્ડ ઉપલબ્ધ કરાવવા સહિત તપાસમાં અમારો સંપૂર્ણ સહકાર ચાલુ રાખીશું.
