બોલીવૂડ એક્ટર ડીનો મોરિયા (Dino Morea)ની મુશ્કેલીઓમાં મોટો વધારો થયો હોવાની માહિતી સામે આવી રહી છે. મિઠી નદીના કથિત ગેરવ્યવહાર પ્રકરણની તપાસના સંદર્ભમાં મુંબઈ પોલીસે સતત આઠ કલાક સુધી ચાલેલી મેરેથોન પૂછપરછ બાદ એક્ટર સામે કડક કાનૂની કાર્યવાહી હાથ ધરવામાં આવી હોવાની માહિતી સૂત્રો દ્વારા સામે આવી રહી છે. 

પોલીસ દ્વારા કરવામાં આવેલી આ આકરી કાર્યવાહીને પગલે બોલીવૂડ અને મનોરંજન જગતમાં ભારે સનસનાટી મચી ગઈ છે. તપાસ એજન્સીઓ આ મામલે અન્ય કડીઓ જોડવા અને વધુ પુરાવા એકત્ર કરવા માટે ઊંડાણપૂર્વક તપાસ કરી રહી છે. જોકે, આ બાબતે ડીનો મોરિયાની ધરપકડ થઈ હોવાના અહેવાલો સામે આવી રહ્યા છે, પરંતુ આ અંગે કોઈ સત્તાવાર માહિતી ઉપલબ્ધ થઈ શકી નહોતી. 

પોલીસ મથકે હાજર થયા બાદ તપાસ અધિકારીઓએ ડીનો મોરિયા સામે કેસ સંબંધિત દસ્તાવેજો અને નાણાંકીય વ્યવહારોને લઈને સવાલોની લાંબી યાદી મૂકી હતી. સૂત્રોના જણાવ્યા અનુસાર, લાંબી પૂછપરછ દરમિયાન કેટલાક મહત્વના પ્રશ્નો પર યોગ્ય અને સંતોષકારક સ્પષ્ટતા ન મળતાં પોલીસે કાયદાકીય જોગવાઈઓ હેઠળ આગળની કડક કાર્યવાહી કરવાનો નિર્ણય લીધો હતો.

આ મામલો આર્થિક ગેરરીતિ, નાણાંકીય લેવડદેવડ અથવા અગાઉ ચર્ચામાં આવેલા વિવાદાસ્પદ કનેક્શન સાથે જોડાયેલો હોવાનું માનવામાં આવી રહ્યું છે. અગાઉ પણ તપાસ એજન્સીઓએ કેટલાક મોટા કેસોમાં પૂછપરછ માટે બોલીવૂડ હસ્તીઓને સમન્સ પાઠવ્યા હતા, જેમાં ડીનો મોરિયાનું નામ પણ સામેલ હતું.

પોલીસ દ્વારા નિયમ મુજબ એક્ટરનું મેડિકલ ચેકઅપ કરાવ્યા બાદ આગળની કાનૂની પ્રક્રિયા હાથ ધરાશે. તપાસ એજન્સીઓ આ કેસમાં અન્ય કોઈ મોટી હસ્તીઓની સંડોવણી છે કે કેમ તે અંગે પણ ઝીણવટભરી તપાસ કરી રહી છે. બીજી તરફ, અભિનેતાની કાનૂની ટીમ જામીન મેળવવા માટે કોર્ટમાં અરજી કરવાની તૈયારી કરી રહી હોવાની માહિતી સામે આવી રહી છે.