અમદાવાદઃ અમદાવાદ શહેર ક્રાઈમ બ્રાન્ચને મળેલી ચોક્કસ ગુપ્ત માહિતીના આધારે, એક ગેંગ અનેક રાજ્યોમાં સક્રિય રીતે કાર્યરત છે, જે વેઈબ્રિજમાં હેરાફેરી કરીને ભંગાર ખરીદીમાં છેતરપિંડી કરતી હતી. 
અમદાવાદઃ શહેરના ક્રાઈમ બ્રાન્ચે એક ગેંગ ઝડપી પાડી હતી, જે વેઈબ્રિજમાં હેરાફેરી કરી ભંગાર ખરીદતી હતી. ક્રાઈમ બ્રાન્ચને માહિતી મળતા આ અંગે તપાસ શરૂ કરી હતી. 

તપાસ દરમિયાન, એવું બહાર આવ્યું હતું કે આરોપીઓએ વેઈબ્રિજ પર વપરાતા ઇલેક્ટ્રોનિક વજન મશીનોમાં ગેરકાયદે એક ખાસ પ્રકારની માઇક્રોચિપ ઇન્સ્ટોલ કરી હતી. આ મશીનોની વેઈ ડિસ્પ્લે  સિસ્ટમ સાથે છેડછાડ કરી હતી. આ ઉપરાંત, તેમણે  સિસ્ટમમાં ચાલાકી કરવા માટે ખાસ ડિઝાઇન કરેલા રિમોટ કંટ્રોલનો ઉપયોગ કર્યો હતો. ખરીદેલા ભંગારનું વજન ઓછું જણાવી તેઓ સ્ક્રેપ વેચતી કંપની અને સાઈટના માલિકોને છેતરતા હતા. 

તપાસ આગળ વધતી ગઈ તેમ, અમદાવાદ ક્રાઈમ બ્રાન્ચને એક નક્કર બાતમી મળી કે આ ગેંગના સભ્યો જીઆઈડીસી ફેઝ-3 વિસ્તારમાં ગેરકાયદે સાધનો સાથે ભેગા થઈ રહ્યા છે. આ બાતમીના આધારે, ક્રાઈમ બ્રાન્ચની ટીમે વટવા જીઆઈડીસી વિસ્તારમાં દરોડો પાડ્યો હતો અને 7 આરોપીને સફળતાપૂર્વક પકડી લીધા હતા. આ કેસમાં પોલીસે રૂ. 19,10,500નો મુદ્દામાલ કબ્જે કર્યો હતો.