નવી દિલ્હીઃ ચોથી ઑક્ટોબરે જાપાનમાં પૂરી થયેલી 20મી એશિયન ગેમ્સ (Asian Games)માં ભારતના જે ઍથ્લીટો અને ખેલાડીઓ ચંદ્રક જીત્યા હતા તેમને વડા પ્રધાન નરેન્દ્ર મોદી ગુરુવાર, 15મી ઑક્ટોબરે મળશે અને શાનદાર સમારોહમાં તેમનું સન્માન કરશે.

ભારતથી કુલ 503 સ્પર્ધક એશિયન ગેમ્સ માટે જાપાન ગયા હતા. એમાંથી લગભગ 100 પુરુષ અને 100 મહિલા ઍથ્લીટો વિવિધ કૅટેગરીઓમાં મેડલ જીત્યા હતા. શૂટર નીરુ ઢાંડા, તીરંદાજ કુમકુમ મોહોડ, રનર વિથ્યા રામરાજ, તીરંદાજ ચિકિતા તનિપર્થી તેમ જ સાહિલ જાધવ સહિત ઘણા ઍથ્લીટો એક કરતાં વધુ ચંદ્રક જીત્યા હતા. ભારત પુરુષ તથા મહિલા ક્રિકેટ ટીમ તેમ જ હૉકી ટીમ ગોલ્ડ મેડલ જીતી હતી.

શ્રેયસ ઐયરના નેતૃત્વમાં મેન્સ ક્રિકેટ ટી-20 ટીમ હાલમાં ઘરઆંગણે વેસ્ટ ઇન્ડિઝ સામે સિરીઝ રમે છે જેમાં 2-1થી આગળ છે. શ્રેણીની ચોથી ટી-20 મૅચ બુધવારે હૈદરાબાદમાં અને અંતિમ મૅચ શનિવારે બેંગ્લૂરુમાં રમાશે. આ બે મૅચ વચ્ચે (ગુરુવાર, 15મી ઑક્ટોબરે) ભારતીય મેન્સ ટીમ પાટનગર દિલ્હીમાં પીએમ મોદી (Modi)ના સમારોહમાં હાજરી આપશે એવી સંભાવના છે.

જાપાનમાં આઇચી-નાગોયા, નિશીન વગેરે સ્થળોએ ક્રિકેટ સહિત વિવિધ રમતોની હરીફાઈઓ યોજાઈ હતી જેમાં 46 દેશના કુલ 10,800 સ્પર્ધકોએ ભાગ લીધો હતો. રમતોત્સવ 19મી સપ્ટેમ્બરે શરૂ થયો હતો.

ભારતે 2022ની પાછલી એશિયન ગેમ્સની જેમ 46 દેશમાં ચોથું સ્થાન મેળવ્યું હતું. જોકે 2022ના કુલ 28 ગોલ્ડ સહિતના 106 ચંદ્રકોની તુલનામાં આ વખતે ભારતે 21 ગોલ્ડ સહિત 85 ચંદ્રક જીતી લીધા હતા.