મુંબઈ/જાલનાઃ મરાઠા અનામત આંદોલનના નેતા મનોજ જરાંગેનું અનામત માટેનું આંદોલન બુધવારે ૧૨મા દિવસમાં પ્રવેશ્યું હતું. તેમણે મહારાષ્ટ્રના નાયબ મુખ્યપ્રધાન એકનાથ શિંદે પર આકરા પ્રહારો કરતા કહ્યું કે તેઓ ઈચ્છે છે કે સમાજના સભ્યો પરસ્પર લડે. પરંતુ તેમણે આવું પાપ ન કરવું જોઈએ. અન્યથા, તે દરેક બાબત માટે એકલા જ જવાબદાર રહેશે.
રાજ્યના પ્રધાન અને મરાઠા અનામત પેટા-સમિતિના અધ્યક્ષ રાધાકૃષ્ણ વિખે પાટીલ પર માત્ર મીઠી વાતો અને આશ્વાસનો દ્વારા સમાજ સાથે વિશ્વાસઘાત કરવાનો આરોપ મૂકતા, તેમણે ચેતવણી આપી હતી કે જો ૧૨ સપ્ટેમ્બર સુધીમાં તેમની માંગણીઓ સંતોષવામાં નહીં આવે તો તેઓ મુંબઈ તરફ કૂચ કરશે.
જરાંગે જાલના જિલ્લાના અંતરવાલી સારાટી ગામમાં મરાઠા સમુદાય માટે 'અન્ય પછાત વર્ગ' (ઓબીસી) શ્રેણી હેઠળ અનામતની માંગણી સાથે આંદોલન કરી રહ્યા છે. તેઓ હૈદરાબાદ અને સતારાના ગેઝેટ રેકોર્ડ્સના અમલીકરણ તેમજ મરાઠા સમુદાયના પાત્ર સભ્યોને 'કુણબી' જાતિના પ્રમાણપત્રો જારી કરવાની પણ માંગ કરી રહ્યા છે.
છત્રપતિ સંભાજીનગરમાં કુણબી પ્રમાણપત્રો અને મરાઠા અનામત સંબંધિત રેકોર્ડ્સ અંગેની એક ઉચ્ચ-સ્તરીય સમિતિની બેઠક બાદ રાજ્યના પ્રધાન ઉદય સામંતે દાવો કર્યો હતો કે મરાઠવાડા ક્ષેત્રમાં કુણબી પ્રમાણપત્રો આપવાની પ્રક્રિયામાં અરજીઓ નામંજૂર થવાનો દર માત્ર ૦.૩ ટકા હતો.
સામંત અને ભાજપના એમએલસી પ્રસાદ લાડ દ્વારા યોજાયેલી બેઠકનો ઉલ્લેખ કરતા જરાંગેએ કહ્યું કે સરકાર માત્ર બેઠકો યોજી રહી છે અને એવો દાવો કરી રહી છે કે તેમની માંગણીઓ સંતોષવામાં આવી છે.
તેમણે દાવો કર્યો હતો કે છત્રપતિ સંભાજીનગરમાં યોજાયેલી બેઠક મરાઠા આંદોલનને પાટા પરથી ઉતારી દેવાના "ષડયંત્ર"નો એક ભાગ હતી. રાજકીય નેતાઓ તરફથી મળતી કથિત ધમકીઓને ફગાવી દેતા જરાંગેએ કહ્યું કે, દબાણ હેઠળ આંદોલન પાછું ખેંચવામાં આવશે નહીં. આગામી કાર્યવાહી અંગે જરાંગેએ કહ્યું કે આ મુદ્દાના ઉકેલ માટે સરકાર પાસે ૧૨ સપ્ટેમ્બર સુધીનો સમય છે.
