મુંબઈ: લાલબાગચા રાજાના ગણપતિ પંડાલમાં આ વર્ષે ભક્તોનું ધ્યાન એક અનોખી વિશાળ પ્રતિમા તરફ ખેંચાઈ રહ્યું છે. ગ્લેનઈગલ્સ હોસ્પિટલ મુંબઈએ બુધવારે ‘ઓર્ગન્સ ઓફ હોપ’ નામની અંગદાન જાગૃતિ પહેલ હેઠળ 15.59 મીટર ઊંચી ફાઇબરગ્લાસની પ્રતિમા સ્થાપિત કરી છે. તેમાં માનવ શરીરના વિવિધ મહત્વપૂર્ણ અંગોને દર્શાવવામાં આવ્યા છે. હોસ્પિટલના જણાવ્યા અનુસાર આ પ્રતિમાને ‘સૌથી મોટી ફાઇબરગ્લાસ અંગોની પ્રતિમા’ માટે ગિનિસ વર્લ્ડ રેકોર્ડ પણ એનાયત થયો છે.
લાલબાગચા રાજા સાર્વજનિક ગણેશોત્સવ મંડળના સહયોગથી હાથ ધરાયેલી આ પહેલનો હેતુ અંગદાન અંગેની જાગૃતિને હોસ્પિટલની બહાર સમાજના કેન્દ્ર સુધી પહોંચાડવાનો છે. હોસ્પિટલના મુખ્ય કાર્યકારી અધિકારી ડૉ. બિપિન ચેવાલેએ આ બાબતે માહિતી આપતા જણાવ્યું હતું કે સમયસર સારવાર અને અંગ પ્રત્યારોપણની જરૂરિયાત દર્દીઓ તથા તેમના પરિવારજનો પર ઊંડી અસર કરે છે. આ પહેલ દ્વારા અંગદાન અંગેની ગેરમાન્યતાઓ દૂર કરવા અને લોકોને પોતાના પરિવાર સાથે અંગદાન અંગે ખુલ્લી ચર્ચા કરવા પ્રોત્સાહિત કરવાનો પ્રયાસ કરવામાં આવ્યો છે.
ગણેશોત્સવ દરમિયાન લાલબાગચા રાજાના દર્શન માટે હજારો ભક્તો આવતા હોવાથી આ સ્થળને અંગદાનનો સંદેશ લોકો સુધી પહોંચાડવા માટે પસંદ કરવામાં આવ્યું છે. હોસ્પિટલનું કહેવું છે કે ધાર્મિક શ્રદ્ધા, આરોગ્ય અને સામુદાયિક જાગૃતિને એકસાથે જોડતી આ પહેલ લોકોમાં અંગદાન અંગેની પહેલ શરૂ કરાવવાનો પ્રયાસ છે. ગિનિસ વર્લ્ડ રેકોર્ડ એનાયત થવો આ અભિયાન માટે વધુ એક મહત્વપૂર્ણ સિદ્ધિ ગણાવવામાં આવી રહ્યું છે.
