અમદાવાદઃ ગુજરાતમાં રોકાણકારોનો વિશ્વાસ મજબૂત રીતે પાછો ફરતો દેખાઇ રહ્યો છે. શેરબજારમાં મહિનાઓની અનિશ્ચિતતા બાદ, રાજ્યના રોકાણકારો દ્વારા રાખવામાં આવેલા ઇક્વિટી મ્યુચ્યુઅલ ફંડ રોકાણનું મૂલ્ય જૂનમાં ₹7,267.54 કરોડ વધ્યું છે, જેનાથી કુલ એસેટ્સ અંડર મેનેજમેન્ટ (AUM) વધીને રેકોર્ડ ₹3,87,309.73 કરોડ થઈ ગયું છે. જે દર્શાવે છે કે બજારમાં મંદી દરમિયાન પોતાના રોકાણ પર બ્રેક લગાવનાર ઘણા રોકાણકારો ધીમે-ધીમે પાછા ફરી રહ્યા છે.

ઇક્વિટી મ્યુચ્યુઅલ ફંડ્સ નવી ઊંચાઈએ 

તાજેતરના ઉદ્યોગ ડેટા અનુસાર, ગુજરાતનું ઇક્વિટી મ્યુચ્યુઅલ ફંડનું AUM (એસેટ્સ અંડર મેનેજમેન્ટ) મે મહિનામાં ₹3,80,042.19 કરોડથી વધીને જૂનમાં ₹3,87,309.73 કરોડ થઈ ગયું છે, જે માસિક ધોરણે 1.91% નો વધારો દર્શાવે છે.

અગાઉના બે મહિનામાં પણ મજબૂત નફા બાદ આ સ્થિતિ સર્જાઈ છે. એપ્રિલમાં ઇક્વિટી મ્યુચ્યુઅલ ફંડની સંપત્તિમાં ₹14,208.65 કરોડ અને મે મહિનામાં ₹14,250.75 કરોડનો વધારો થયો હતો.

આ વર્ષની શરૂઆતમાં, શેરબજારમાં અસ્થિરતાને કારણે માર્ચ મહિનામાં મ્યુચ્યુઅલ ફંડની સંપત્તિમાં ₹19,480.87 કરોડનો તીવ્ર ઘટાડો થયો હતો. જો કે, ત્યારથી રોકાણકારોના સેન્ટિમેન્ટમાં સતત સુધારો થયો છે.

ગયા વર્ષની સરખામણીમાં મજબૂત વૃદ્ધિ

ગુજરાતની ઇક્વિટી મ્યુચ્યુઅલ ફંડની એસેટ્સમાં છેલ્લા એક વર્ષમાં 15.2% નો વધારો થયો છે, જે જૂન 2025 માં આશરે ₹3.36 લાખ કરોડથી વધીને જૂન 2026 માં ₹3.87 લાખ કરોડ થઈ ગઈ છે.

આ દર્શાવે છે કે બજારના ઉતાર-ચઢાવછતાં, રોકાણકારોએ લાંબા ગાળે ઇક્વિટી મ્યુચ્યુઅલ ફંડ દ્વારા એસેટ્સ નિર્માણ કરવાનું ચાલુ રાખ્યું છે.

રોકાણકારો બજારમાં પાછા ફરી રહ્યા છે

નાણાકીય સલાહકારોનું કહેવું છે કે માર્ચમાં બજારના કરેક્શન (સુધારા) દરમિયાન રોકાણ અટકાવી દેનારા ઘણા રોકાણકારો હવે ફરીથી રોકાણની તકો શોધી રહ્યા છે.

નિષ્ણાતો માને છે કે જે લોકો ઘણા વર્ષોથી રોકાણ કરી રહ્યા છે તેઓ સમજે છે કે બજારમાં આવતો ઘટાડો એ રોકાણનો એક સામાન્ય ભાગ છે. ઘટતા બજારથી દૂર રહેવાને બદલે, ઘણા લોકો હવે તેને વધુ સારી કિંમતે રોકાણ કરવાની અને તેમના પોર્ટફોલિયોને ફરીથી સંતુલિત કરવાની તક તરીકે જુએ છે.

વર્તમાન રોકાણકારો તેમની SIP માં યોગદાન વધારી રહ્યા છે, જે લાંબા ગાળાના રોકાણ પ્રત્યેનો નવો વિશ્વાસ દર્શાવે છે.

પરંપરાગત ફંડ્સ ઉપરાંત અન્ય ક્ષેત્રોમાં પણ રસ વધી રહ્યો છે

વેલ્થ એડવાઇઝર્સ એ વાત પર પણ ભાર મૂકે છે કે રોકાણકારો હવે માત્ર પરંપરાગત ઇક્વિટી ફંડ્સ પૂરતા મર્યાદિત નથી રહ્યા. ઇન્ફ્રાસ્ટ્રક્ચર જેવા ક્ષેત્રોમાં રસ વધી રહ્યો છે, કારણ કે રોકાણકારો એવા ક્ષેત્રો શોધી રહ્યા છે જે ભારતની લાંબા ગાળાની આર્થિક વૃદ્ધિથી લાભ મેળવી શકે.

નિષ્ણાતોનું કહેવું છે કે આ એક વધુ સમજદાર અભિગમ દર્શાવે છે, જ્યાં રોકાણકારો માત્ર ટૂંકા ગાળાના બજારના ઉતાર-ચડાવ પર ધ્યાન કેન્દ્રિત કરવાને બદલે ભવિષ્યની સંભાવનાઓ ધરાવતા ક્ષેત્રો પર વધુ ધ્યાન આપી રહ્યા છે.

SIP પસંદગીનો વિકલ્પ 

ઇક્વિટી મ્યુચ્યુઅલ ફંડ રોકાણમાં વધારો છતાં, એડવાઇઝર માને છે કે મોટાભાગના રોકાણકારો એક સાથે મોટી રકમ (લમ્પસમ) રોકાણ કરવાના બદલે SIP (સિસ્ટમેટિક ઇન્વેસ્ટમેન્ટ પ્લાન) દ્વારા રોકાણ કરવાનું પસંદ કરે છે.