સુરેન્દ્રનગરઃ મૂળી તાલુકાના દુધઈમાં ગેરકાયદેસર ખનન-વહન અંગેની ગ્રામ પંચાયત અને સ્થાનિકોની રજૂઆતો બાદ ખાણ-ખનિજ વિભાગે કાર્યવાહી શરૂ કરતાં ખનિજ ક્ષેત્રે ચકચાર મચી હતી. તા.11 સપ્ટેમ્બર 2026ના રોજ ખાણ-ખનિજ વિભાગની ટીમે સ્થળ તપાસ કરતાં ગેલા વસરામ રબારીની ફાયરક્લે ખનિજની લીઝ છેલ્લા બે વર્ષથી સીલ હોવા છતાં આસપાસ ખનિજ ખનન થયાનું તપાસમાં સામે આવ્યું હતું. વિભાગની માપણી દરમિયાન અંદાજે 5,600 ટન ફાયરક્લે ખનિજનું ગેરકાયદેસર ખનન-વહન થયાનું સામે આવતા ગેલા વસરામ રબારી સામે રૂ.16.30 લાખનો દંડ ફટકારવામાં આવ્યો હોવાનું જાણવા મળ્યું હતું.
ગેલા વસરામ રબારીની પત્નીના નામે ચાલતા સિલિકા સ્ટોન ક્રશર (ભરડિયા)ની પણ ખાણ-ખનિજ વિભાગ દ્વારા તપાસ કરવામાં આવી હતી. તપાસ દરમિયાન પાસ-પરમિટ વગરનો આશરે 388 ટન સિલિકા જથ્થો મળી આવતા રૂ.2.62 લાખનો દંડ કરવામાં આવ્યો હતો. અન્ય ગેરરીતિઓ સામે આવતા ક્રશરને સીલ કરવાની કાર્યવાહી પણ હાથ ધરવામાં આવી હોવાનું જાણવા મળે છે.
અગાઉ પણ મામલતદાર મૂળી તથા ગુજરાત પ્રદૂષણ નિયંત્રણ બોર્ડની ટીમ દ્વારા આ સ્થળે તપાસ અને કાર્યવાહી કરવામાં આવી હોવાનું સામે આવ્યું હતું.
ફાયરક્લેના ભરડિયાની તપાસ દરમિયાન પણ વિવિધ નિયમોના ભંગની બાબતો સામે આવી હોવાનું તંત્રના તપાસ અહેવાલના આધારે જાણવા મળ્યું હતું. પ્રદૂષણ નિયંત્રણ સંબંધિત નિયમોના પાલન અંગે પણ પ્રશ્નો ઊભા થતાં દંડાત્મક કાર્યવાહી હાથ ધરવામાં આવી હતી. મામલતદાર દ્વારા ભરડિયાને સીલ કરવાની કાર્યવાહી પણ કરવામાં આવી હતી.
દુધઈ વિસ્તારમાં મોટા પ્રમાણમાં ખનિજ સંપદા હોવાના કારણે છેલ્લા કેટલાક સમયથી ગેરકાયદેસર ખનન અંગે સ્થાનિકોમાં રોષ જોવા મળી રહ્યો છે. ગ્રામજનોના આક્ષેપ મુજબ રાત્રિના અને વહેલી સવારના સમયે ટ્રકો-ડમ્પરો દ્વારા ખનિજનો જથ્થો અન્ય વિસ્તારો તરફ લઈ જવામાં આવે છે. ખનન માટે હિટાચી અને જેસીબી જેવી ભારે મશીનરીનો ઉપયોગ થતો હોવાના પણ આક્ષેપો છે.
ગેરકાયદેસર ખનન અંગે રજૂઆત કરનારા ગ્રામજનો અને ગ્રામ પંચાયતના સભ્યોને ધાકધમકી આપવામાં આવતી હોવાના આક્ષેપો પણ કરવામાં આવ્યા છે. આ આક્ષેપોની સ્વતંત્ર પુષ્ટિ થવી હજુ બાકી છે.
દુધઈ ગ્રામ પંચાયત દ્વારા મામલતદાર મૂળી અને પ્રાંત અધિકારી ચોટીલા સમક્ષ કરવામાં આવેલી રજૂઆતો બાદ ખાણ-ખનિજ વિભાગ દ્વારા તપાસ હાથ ધરવામાં આવી હતી. હવે લીઝ, ક્રશર અને ભરડિયાઓ સામે કાર્યવાહી શરૂ થતાં વિસ્તારમાં ચકચાર મચી હતી. સ્થાનિકોમાં અન્ય સ્થળોએ પણ સઘન તપાસ હાથ ધરવામાં આવે તેવી માંગ ઉઠી હતી. ખાણ-ખનિજ વિભાગની આગામી કાર્યવાહી પર હવે દુધઈ સહિત સમગ્ર મૂળી પંથકની નજર મંડાઈ છે.
