પશ્ચિમ એશિયામાં ચાલી રહેલો તણાવ હવે તેના ચરમસીમાએ પહોંચી ગયો છે. અમેરિકી રાષ્ટ્રપતિ ડોનાલ્ડ ટ્રમ્પે સત્તાવાર રીતે જાહેરાત કરી છે કે અમેરિકાએ ઈરાન વિરુદ્ધ "મેજર કોમ્બેટ ઓપરેશન્સ" (મોટી સૈન્ય કાર્યવાહી) શરૂ કરી દીધી છે. સોશિયલ મીડિયા પ્લેટફોર્મ 'ટ્રુથ સોશિયલ' પર એક વિડિયો સંદેશ જારી કરીને ટ્રમ્પે સ્પષ્ટ કર્યું કે આ અભિયાનનો મુખ્ય હેતુ અમેરિકી જનતાની રક્ષા કરવાનો અને ઈરાન તરફથી ઉભા થયેલા સંભવિત ખતરાઓને જડમૂળથી ઉખેડી નાખવાનો છે. ટ્રમ્પના આ નિવેદને વૈશ્વિક રાજકારણમાં ખળભળાટ મચાવી દીધો છે.
ટ્રમ્પે ઈરાની શાસનને અત્યંત ઘાતક અને ખતરનાક ગણાવતા કહ્યું કે અમેરિકા કોઈ પણ સંજોગોમાં ઈરાનને પરમાણુ હથિયાર મેળવવા દેશે નહીં. તેમણે આરોપ લગાવ્યો કે ઈરાને ફરીથી પોતાના પરમાણુ કાર્યક્રમને વેગ આપ્યો છે અને તે એવી લોંગ રેન્જ મિસાઈલો બનાવી રહ્યું છે જે અમેરિકા અને તેના મિત્ર દેશો માટે મોટો ખતરો છે. ટ્રમ્પે અત્યંત આક્રમક શબ્દોમાં ચેતવણી આપી છે કે અમેરિકી સેના ઈરાનની મિસાઈલ ઈન્ડસ્ટ્રી અને તેની નૌસેનાને સંપૂર્ણપણે તબાહ કરી દેશે. આ સાથે જ તેમણે ઈરાની સેના IRGC ને આત્મસમર્પણ કરી દેવા પણ આદેશ આપ્યો છે.
ઈરાન વિરુદ્ધની આ કાર્યવાહી હવાઈ અને દરિયાઈ બંને માર્ગે કરવામાં આવી રહી છે. અમેરિકાએ મધ્ય પૂર્વમાં તેના સૌથી શક્તિશાળી સૈન્ય સંસાધનો તૈનાત કર્યા છે, જેને ટ્રમ્પે "વિશાળ નૌકાકાફલો" ગણાવ્યો છે. આ કાફલામાં વિશ્વના સૌથી મોટા યુદ્ધજહાજો પૈકીના એક 'USS Gerald R. Ford' અને 'USS Abraham Lincoln' નો સમાવેશ થાય છે. જેરાલ્ડ ફોર્ડ એ અમેરિકાનું સૌથી નવું પરમાણુ સંચાલિત એરક્રાફ્ટ કેરિયર છે, જે 75 થી વધુ વિમાનો લઈ જવાની ક્ષમતા ધરાવે છે. જ્યારે અબ્રાહમ લિંકન પણ 90 થી વધુ સૈન્ય વિમાનો સાથે ઈરાનને જડબાતોડ જવાબ આપવા સજ્જ છે.
ટ્રમ્પના આ આક્રમક વલણ બાદ સમગ્ર ક્ષેત્રમાં ભયનો માહોલ છે. જોકે, હજુ એ સ્પષ્ટ નથી થયું કે આ હુમલાઓ ઈઝરાયેલ સાથે મળીને કરવામાં આવી રહ્યા છે કે અમેરિકા એકલું લડી રહ્યું છે. બીજી તરફ, ઈરાન પણ આક્રમક રીતે વળતો પ્રહાર કરવાની તૈયારી કરી રહ્યું હોવાના અહેવાલો છે. જો આ સંઘર્ષ વધુ વણસે તો તે એક વ્યાપક પ્રાદેશિક યુદ્ધમાં પરિવર્તિત થઈ શકે છે. અત્યારે સમગ્ર વિશ્વની નજર આ યુદ્ધના આગામી તબક્કા પર છે, કારણ કે આ ટકરાવની અસર વૈશ્વિક અર્થતંત્ર અને ખાસ કરીને ક્રૂડ ઓઈલના ભાવ પર પડી શકે છે.
