મુંબઈ/છત્રપતિ સંભાજી નગર: કોકરોચ જનતા પાર્ટી (સીજેપી)ના સંસ્થાપક અભિજીત દિપકેએ દાવો કર્યો હતો કે 20 જુલાઈના રોજ સંસદ ચલો મોરચા દરમિયાન વિદ્યાર્થીઓ પર જોર જુલમ કરવાના આદેશ કેન્દ્રીય ગૃહ પ્રધાન અમિત શાહ તરફથી આવ્યા હોવા જોઈએ અને પોલીસ કાર્યવાહીના મુદ્દે તેમનું રાજીનામું માંગ્યું હતું.

પક્ષોને તોડવા માટે કેન્દ્રીય તપાસ એજન્સીઓનો ઉપયોગ

મધ્ય મહારાષ્ટ્રના છત્રપતિ સંભાજી નગર સ્થિત પોતાના નિવાસસ્થાને સંવાદદાતાઓ સાથેની વાતચીતમાં તેમણે કહ્યું હતું કે દેશમાં લોકશાહી જોખમમાં છે અને ન્યાયતંત્ર પર પણ સવાલો ઊભા થઈ રહ્યા છે. રાજકીય પક્ષોને તોડવા માટે કેન્દ્રીય તપાસ એજન્સીઓનો ઉપયોગ કરવામાં આવી રહ્યો છે. લોકશાહીને બચાવવી એ હવે માત્ર વિપક્ષનો મુદ્દો નથી. જનતાએ સંગઠિત થઈ એ બચાવવી પડશે.'

ન્યાયતંત્ર પર પણ પ્રશ્નાર્થ ચિહ્ન છે

'નીટ'ની પરીક્ષાના પેપર લીક થવાના મુદ્દે નવી દિલ્હીના જંતર-મંતર પર એક મહિનાથી વધુ સમય સુધી ચાલેલા વિરોધ પ્રદર્શન જોયા બાદ દિપકેએ સ્વદેશ પરત આવ્યો  હતો. તેણે એમ પણ જણાવ્યું હતું કે 'ન્યાયતંત્ર પર પણ પ્રશ્નાર્થ ચિહ્ન છે. 

આપણે બધાએ જોયું છે કે કેવી રીતે શિવસેના અને એનસીપી જેવા પક્ષોને તોડવા માટે ઇડી અને સીબીઆઈનો ઉપયોગ કરવામાં આવ્યો હતો. દેશની અગ્રણી સંસ્થાઓની ફરજ હતી કે તેઓ લોકશાહીને જીવંત રાખે અને એક પણ વ્યક્તિની સરમુખત્યારશાહી ન બનવા દે. તેઓએ એમ થવા દીધું. આને રોકવા માટે માત્ર વિપક્ષ જ નહીં, પરંતુ લોકોએ પણ એક થવું પડશે.'

પ્રધાનને હટાવ્યા પછી બીજા વિચિત્ર માણસને બેસાડ્યા

30 વર્ષીય આંદોલનકર્તાએ નવા શિક્ષણ પ્રધાન તરીકે પ્રહલાદ જોશીની નિમણૂકની ટીકા કરી તેમને વિચિત્ર વ્યક્તિ ગણાવી આરોપ કર્યો હતો કે 'જો દેશના શિક્ષણ પ્રધાન બળાત્કારીઓની પ્રશંસા કરતા હોય તો તેનો અર્થ એ છે કે ધર્મેન્દ્ર પ્રધાનને હટાવ્યા પછી બીજા વિચિત્ર માણસને બેસાડવામાં આવ્યો છે. દેશને શું સંદેશ આપવામાં આવી રહ્યો છે? તેઓ બીજું કંઇ કરી શકતા નથી કારણ કે તેમનો પક્ષ ગુંડાઓથી ભરેલો છે. રામ રહીમ (બળાત્કારના ગુનેગાર) જેવા લોકો તેમના કાર્યકાળ દરમિયાન પેરોલ પર બહાર આવે છે. આ સરકાર ગુંડાઓ અને બળાત્કારીઓને ટેકો આપે છે.

બાબા રામદેવે પતંજલિ પર ધ્યાન આપવું જોઈએ

સીજેપીના સ્થાપકે ભારપૂર્વક જણાવ્યું હતું કે નીટ પેપર લીક અંગે સંગઠનનો વિરોધ બંધારણીય છે. અમે બંધારણીય રીતે પેપર લીક સામે અમારા અધિકારો માટે લડ્યા છીએ. જો કાયદેસર રીતે મહાત્મા ગાંધી અને બીઆર આંબેડકરના ફોટા સાથે આંદોલન કરવું એ સંસ્કૃતિને બદનામ કરે છે, તો અમે તે કર્યું છે. બાબા રામદેવે પતંજલિ પર ધ્યાન આપવું જોઈએ, જેના વિશે સુપ્રીમ કોર્ટે ભૂતકાળમાં પ્રતિકૂળ ટિપ્પણી કરી છે. જેન ઝી દેશ અને દેશની સંસ્કૃતિને સંભાળવા સક્ષમ છે. 

સીજેપી બહારથી ચલાવાય તો કેવા પ્રકારના 'ચાણક્ય'

લોકસભાના વિપક્ષના નેતા રાહુલ ગાંધી દ્વારા શાહના રાજીનામાની માંગને સમર્થન આપી તેમણે જણાવ્યું હતું કે 'અમિત શાહે ચોક્કસપણે રાજીનામું આપવું જોઈએ. એવું કહેવામાં આવી રહી છે કે કોકરોચ જનતા પાર્ટીને બહારથી ભંડોળ મળી રહ્યું છે અથવા તો આ આંદોલન બહારથી ચાલી રહ્યું છે. જો આવું થઈ રહ્યું છે તો તે અમિત શાહની નિષ્ફળતાને પ્રતિબિંબિત કરે છે. જો સીજેપી બહારથી ચલાવવામાં આવી રહી છે તો તે કેવા પ્રકારના 'ચાણક્ય' છે?

દીપકેએ ખાતરી આપી હતી કે જો ખેડૂતોના આંદોલનમાં સીજેપીના સમર્થનની જરૂર હોય તો તેઓ તેમની પડખે ઊભા રહેશે. હું પણ એક ખેડૂત પરિવારમાંથી આવું છું. આપણામાંના ઘણા ખેડૂત પરિવારમાંથી આવે છે. ગૃહ પ્રધાન અમિત શાહની સાથે દીપકેએ વડા પ્રધાન નરેન્દ્ર મોદી પણ આકરી ટિપ્પણી કરી હતી.