વધારાની એફએસઆઈ માટે વસૂલાશે પ્રીમિયમ

(અમારા પ્રતિનિધિ તરફથી)

મુંબઈ: મુંબઈ મહાનગરપાલિકાએ પોતાની માલિકીની ભાડા પર આપેલી મિલકતોના પુનર્વિકાસને ઝડપી બનાવવા માટે વધારાના ફ્લોર સ્પેસ ઇન્ડેક્સ (એફએસઆઈ) પર વન-ટાઇમ પ્રીમિયમનો પ્રસ્તાવ રાખ્યો છે.  

જૂનમાં સુધાર સમિતિ  દ્વારા મંજૂર કરાયેલો પ્રસ્તાવ આ અઠવાડિયે અંતિમ મંજૂરી માટે પાલિકાની સામાન્ય સભામાં (હાઉસ)માં આવે એવી શકયતા છે. પૉલિસીનો ઉદ્દેશ્ય ડેવલપમેન્ટ કંટ્રોલ ઍન્ડ પ્રમોશન રેગ્યુલેશન (ડીસીપીઆર) ૨૦૩૪ હેઠળ પુનર્વસન પ્રોત્સાહન, પ્રોત્સાહક એફએસઆઈ અને સ્કીમ અમાલગામેશન (એકીકરણ) દ્વારા નિર્માણ થનારા વધારાના બિલ્ટ-અપ સંભવિત માટે સમાન ધોરણો રજૂ કરવાનો છે. 

હાલમાં પાલિકા ફકત વેચાણના હિસ્સામાં આવતી ફંજીબલ એફએસઆઈ પર જ પ્રીમિયમ વસૂલ કરે છે, જ્યારે પુનર્વસન અને પ્રોત્સાહક જોગવાઈ દ્વારા મળતી વધારાની એફએસઆઈને દરેક કેસમાં અલગ-અલગ તપાસના આધારે મંજૂરી આપવામાં આવે છે.

સૂચિત માળખા હેઠળ રેડી રેકનર મૂલ્યના પાંચ ટકાનું વન-ટાઇમ પ્રીમિયમ રેસિડેન્શિયલ ડેવલપમેન્ટ (રહેણાંક વિકાસ) માટે અને ૧૦ ટકા નોન-રેસિડેન્શિયલ (બિન-રહેણાંક) ઉપયોગ માટે વસૂલવામાં આવશે. આ પૉલિસીમાં મ્યુનિસિપલ અને ખાનગી પ્લોટ, મ્યુનિસિપલ મિલકતો વચ્ચે પુનર્વસન જવાબદારીઓનું ટ્રાન્સફર અને મ્યુનિસિપલ ભાડૂતોને ખાનગી જમીનમાં સ્થાનાંતરિત કરતી હાઇબ્રિડ યોજનાઓને પણ આવરી લેવામાં આવશે.

લાગુ પડતા પ્રીમિયમની ચુકવણી પછી જ કામચલાઉ નોન-ઓબ્જેક્શન સર્ટિફિકેટ આપવામાં આવશે. ૨૦૧૭ અને ૨૦૨૩ માં પસંદગીના કેસોમાં વ્યાપક નીતિ વિના સમાન પ્રીમિયમ મંજૂર કરવામાં આવ્યા હતા.

પાલિકાના ઉચ્ચ  અધિકારીએ જણાવ્યું હતું કે સમાન માળખું અનિશ્ર્ચિતતા ઘટાડશે, લાંબા સમયથી બાકી રહેલા પુનર્વિકાસ પ્રોજેક્ટને સરળ બનાવશે અને પાલિકાની માટે વધારાની આવક ઉત્પન્ન કરશે. પાલિકા પાસે તેની મિલકતો પર આશરે ૪૬,૫૬૩ ભાડૂતો છે, જેમાં ૪૨,૦૬૦ રહેણાંક અને ૪,૫૦૫ બિન-રહેણાંક કબજેદારોનો સમાવેશ થાય છે. મોટાભાગના બાંધકામ  ૫૦-૬૦ વર્ષથી વધુ જૂના છે અને ભાડૂતના પુનર્વસનની સુવિધા માટે પુનર્વિકાસ માટે લેવામાં આવી રહી છે.