ભુવનેશ્વરઃ ઓડિશાની રાજધાની ભુવનેશ્વરમાં શુક્રવારે મોડી રાત્રે એક ભયાનક માર્ગ અકસ્માત થતાં-થતાં રહી ગયો. શહેરના પાલાસુની પુલ (Palasuni Bridge) પર એક પૂરપાટ ઝડપે આવી રહેલા ડમ્પરે કારને ટક્કર મારીને થોડે દૂર સુધી ઘસડી હોવાની ઘટના સામે આવી છે. આ અકસ્માતનો વીડિયો સોશિયલ મીડિયા પર ખૂબ વાયરલ થઈ રહ્યો છે, જેને જોઈને લોકો આશ્ચર્યચકિત થઈ ગયા છે અને શહેરની માર્ગ સલામતી વ્યવસ્થા પર સવાલો ઉઠાવી રહ્યા છે.

અકસ્માતનો વીડિયો જોઈને દંગ રહી જશો

પ્રાપ્ત માહિતી મુજબ, એક પિતા પોતાની પુત્રી સાથે કારમાં ક્યાંક જઈ રહ્યા હતા. આ દરમિયાન પાલાસુની પુલ પર પાછળથી આવી રહેલા એક ટ્રકે તેમની કારને ટક્કર મારી દીધી. પ્રત્યક્ષદર્શીઓના જણાવ્યા અનુસાર ટક્કર એટલી જોરદાર હતી કે કાર ટ્રકની આગળ ફસાઈ ગઈ અને થોડે દૂર સુધી રોડ પર ઘસાતી રહી. આ દરમિયાન કારમાં બેઠેલા લોકોના જીવ તાળવે ચોંટી ગયા હતા અને રોડ પર હાજર અન્ય વાહનચાલકોમાં પણ અફરાતફરી મચી ગઈ હતી.
 

ઘટના સમયે કારમાં બેઠેલા પિતા અને પુત્રી ખૂબ જ ગભરાઈ ગયા હતા. જોકે, રાહતની વાત એ રહી કે આ ખતરનાક અકસ્માતમાં બંનેનો આબાદ બચાવ થયો હતો. પ્રાથમિક માહિતી અનુસાર તેમને કોઈ ગંભીર ઈજા થઈ નથી. જો ટ્રક ચાલકે સમયસર વાહન પર કાબૂ મેળવ્યો ન હોત અથવા કાર અન્ય કોઈ વાહન સાથે અથડાઈ હોત, તો આ અકસ્માત વધારે ગંભીર બન્યો હોત.

 

ઓડિશાના ભુવનેશ્વરમાં પાલાસુની બ્રિજ પર એક ભયાનક અકસ્માતનો લાઈવ વિડીયો સામે આવ્યો છે. અહીં એક તેજ રફતાર ટ્રકે કારને પાછળથી ટક્કર મારીને રોડ પર દિલધડક રીતે ઘસડી હતી. અકસ્માત સમયે કારમાં પિતા અને પુત્રી સવાર હતા, જેમનો આબાદ બચાવ થયો છે. સોશિયલ મીડિયા પર વાયરલ થઈ રહેલો આ ભયાનક… pic.twitter.com/xXDgGOhKQa

— Mumbai Samachar Official (@Samachar_Mumbai) May 30, 2026

ટ્રક ડ્રાઈવરની ધરપકડ 

ઘટના બાદ પોલીસે ટ્રક ડ્રાઇવરની ધરપકડ કરી લીધી છે અને તપાસ શરૂ કરી દીધી છે. સમગ્ર ઘટનાક્રમની સાચી વિગત મેળવવા અને અકસ્માતના કારણો શોધવા માટે અધિકારીઓએ વિસ્તારના સીસીટીવી (CCTV) ફૂટેજ તેમજ સોશિયલ મીડિયા પર વાયરલ થઈ રહેલા વીડિયોની પણ તપાસ કરી હતી.