મુંબઈ: બોમ્બે હાઈ કોર્ટના કડક નિર્દેશો બાદ સેન્ટ્રલ બ્યુરો ઓફ ઈન્વેસ્ટિગેશન (સીબીઆઈ) દ્વારા દિશા સાલિયનના રહસ્યમય મોત અંગે હવે એફઆઇઆર નોંધીને તપાસ શરૂ કરી દેવાઈ છે. આ હાઈ-પ્રોફાઈલ કેસની તપાસની આગેવાની સીબીઆઈના સિનિયર મહિલા અધિકારી સીમા પાહુજાને સોંપવામાં આવી છે. કેન્દ્રિય એજન્સી દ્વારા એફઆઈઆર દાખલ થતાં જ રાજકીય અને બોલીવુડમાં ખળભળાટ મચી ગયો છે.
આ કેસની તપાસ માટે સીબીઆઈના દિલ્હી સ્થિત હેડક્વાર્ટરની સ્પેશિયલ ક્રાઈમ યુનિટમાં એસપી (એસપી) તરીકે ફરજ બજાવતા સીમા પાહુજા પોતાની ખાસ ટીમ સાથે મુંબઈ પહોંચી ગયા છે. તેમની સાથે તપાસ અધિકારી ડેપ્યુટી એસપી પૂરન કુમાર અને ફોરેન્સિક તજજ્ઞો જોડાયા છે. સીબીઆઈની આ ટીમ ૮ જૂન, ૨૦૨૦ના દિશાના મોત પહેલા તેના વાગ્દત્તા રોહિત રોયના ઘરે આયોજિત પાર્ટીમાં હાજર તમામ લોકોના નિવેદનો ફરીથી નોંધશે.
સીબીઆઈ દ્વારા નોંધવામાં આવેલી એફઆઈઆરમાં દિશાના પિતા સતીશ સાલિયનની ફરિયાદ અને અરજીના આધારે પ્રાથમિક વિગતો ઉમેરવામાં આવી છે. આ કેસ સંબંધિત ચર્ચાઓમાં મહારાષ્ટ્રના પૂર્વ પ્રધાન આદિત્ય ઠાકરે, પૂર્વ મુખ્ય પ્રધાન ઉદ્ધવ ઠાકરે, પૂર્વ ગૃહ પ્રધાન અનિલ દેશમુખ, મુંબઈના પૂર્વ પોલીસ કમિશનર પરમબીર સિંહ તેમ જ અભિનેતા ડીનો મોરિયા, સૂરજ પંચોલી, રિયા ચક્રવર્તી અને તેના ભાઈ શૌવિક ચક્રવર્તી જેવા જાણીતા નામો સામે આવ્યા છે.
તપાસ અધિકારી સીમા પાહુજા જટિલ અને સંવેદનશીલ કેસોમાં પુરાવા શોધવા માટે દેશભરમાં જાણીતા છે. તેમણે ઉત્તર પ્રદેશના ચર્ચાસ્પદ હાથરસ અને ઉન્નાવ કાંડ, કોલકાતાનો ૨૦૨૪નો આર. જી. કર હોસ્પિટલ કેસ તેમજ હિમાચલ પ્રદેશના શિમલાનો ગુડિયા રેપ અને મર્ડર કેસ જેવા ગંભીર ગુનાઓની અત્યાધુનિક ફોરેન્સિક ટૂલ્સ વડે સફળ તપાસ કરી છે.
પોતાની શાનદાર કામગીરી અને જટિલ કડીઓ ઉકેલવાની ક્ષમતા બદલ સીમા પાહુજાને વર્ષ ૨૦૨૧માં કેન્દ્રીય સ્તરે 'બેસ્ટ ઈન્વેસ્ટિગેટિંગ ઓફિસર'નો ગોલ્ડ મેડલ એનાયત કરવામાં આવ્યો હતો. તેમના સહકર્મીઓ તેમને અત્યંત પદ્ધતિસર અને બારીકાઈથી તપાસ કરનારા અધિકારી તરીકે ઓળખે છે.
વર્ષ ૨૦૨૦માં બનેલી આ રહસ્યમય ઘટના બાદ મુંબઈ પોલીસે તેને અકસ્માતે થયેલું મોત ગણાવ્યું હતું, પરંતુ હવે બોમ્બે હાઈકોર્ટના આદેશ બાદ સીબીઆઈ તમામ ફોરેન્સિક પુરાવાઓ અને સાક્ષીઓની ફરીથી તપાસ કરી રહી છે. ૪ વર્ષથી વધુ સમય બાદ શરૂ થયેલી આ નવી સીબીઆઈ તપાસથી આખરે દિશા સાલિયનના મોતનું સત્ય બહાર આવશે કે કેમ, તેના પર સમગ્ર દેશની નજર ટકેલી છે.
