મુંબઈ: વસઈ-વિરાર મહાનગરપાલિકાના વસઈ પૂર્વના ગોખીવરે-ભોયદાપાડા વિસ્તારમાં આવેલા આશરે 40 એકરના ડમ્પિંગ ગ્રાઉન્ડમાં રવિવારે રાત્રે ભીષણ આગ લાગી હતી. રાત્રે લગભગ 10:30 વાગ્યે લાગેલી આગના કારણે આસપાસના રહેણાંક વિસ્તારોમાં ધુમાડાના ગોટેગોટા ફેલાઈ ગયા હતા. અચાનક ધુમાડો છવાઈ જતાં સ્થાનિકોમાં ભયનો માહોલ સર્જાયો હતો. ઘટનાની જાણ થતાં મહાનગરપાલિકાના ફાયર બ્રિગેડના જવાનો ઘટનાસ્થળે પહોંચ્યા હતા અને આગ પર કાબૂ મેળવ્યો હતો.
ભોયદાપાડા ડમ્પિંગ ગ્રાઉન્ડ પર દરરોજ 850 ટનથી વધુ કચરો લાવવામાં આવે છે. કચરાની પ્રક્રિયા અને યોગ્ય નિકાલની કામગીરી અટકી જવાને કારણે અહીં કચરાના મોટા ઢગલા બની ગયા છે. આટલી મોટી માત્રામાં કચરો એકઠો થતાં તેની અંદર રાસાયણિક વાયુઓ બનવાની શક્યતા રહે છે અને તેના કારણે અવારનવાર આગ લાગવાની ઘટનાઓ બને છે. રવિવારની આગ બાદ પણ આસપાસના વિસ્તારમાં લાંબા સમય સુધી ધુમાડો ફેલાતો રહ્યો હતો.
આગમાંથી મોટા પ્રમાણમાં નીકળેલો ધુમાડો હવાના પ્રવાહ સાથે નજીકના રહેણાંક વિસ્તારો સુધી પહોંચ્યો હતો, જેના કારણે હવામાં પ્રદૂષણની સ્થિતિ સર્જાઈ હતી. સ્થાનિક રહેવાસીઓનું કહેવું છે કે ડમ્પિંગ ગ્રાઉન્ડમાં આગ લાગવાની આવી ઘટનાઓ વારંવાર બને છે અને કચરો અંદરથી બળતો રહેતાં ધુમાડાની સમસ્યા લાંબા સમય સુધી ચાલુ રહે છે. તેના કારણે લોકોને આંખોમાં બળતરા અને શ્વાસ લેવામાં તકલીફ જેવી અસુવિધાનો સામનો કરવો પડે છે.
🔥 Fire Erupts at Dumping Ground in Gokhivare, Vasai-Virar A massive fire has broken out at a dumping ground in Gokhivare, Vasai-Virar, sending thick smoke into the sky and raising serious concerns over air pollution and public safety. The incident highlights the urgent need for proper waste management and fire-prevention measures at dumping sites. #Gokhivare #VasaiVirar #Fire #DumpingGround #WasteManagement #VVCMC
— Vasai Virar (@vasaivirarinfra) September 27, 2026
વસઈ-વિરાર વિસ્તારમાં વધતા શહેરીકરણ સાથે કચરા વ્યવસ્થાપનની સમસ્યા પણ ગંભીર બની રહી છે. 40 એકરના આ ડમ્પિંગ ગ્રાઉન્ડ પર દરરોજ 850 ટનથી વધુ કચરો ઠલવાતો હોવા છતાં કચરાની પ્રક્રિયા અટકી પડતાં કચરાના ઢગલા સતત વધી રહ્યા છે. આ સ્થિતિમાં આગની ઘટનાઓ અને તેના કારણે ફેલાતા ધુમાડાને લઈને સ્થાનિક રહેવાસીઓમાં ચિંતા વધી છે. હાલ ફાયર બ્રિગેડે આગ પર નિયંત્રણ મેળવ્યું છે.
