(અમારા પ્રતિનિધિ તરફથી)
મુંબઈ: રાજ્ય સરકાર સંજય ગાંધી રાષ્ટ્રીય ઉદ્યાન વિસ્તારમાં અતિક્રમણ કરનારાઓના પુનર્વસન માટે પ્રયાસો કરી રહી છે અને આ સંદર્ભમાં ટૂંક સમયમાં વ્યાપક નિર્ણય લેવામાં આવશે, એમ રાજ્યના વન ખાતાના પ્રધાન ગણેશ નાઈકે વિધાન પરિષદમાં જણાવ્યું હતું. 

વિધાનસભ્ય પ્રવીણ દરેકરે કરેલા રસપ્રદ સૂચનનો જવાબ આપતા નાઈકે જણાવ્યું હતું કે સંજય ગાંધી રાષ્ટ્રીય ઉદ્યાન વિસ્તારમાં અતિક્રમણ કરનારાઓના પ્રશ્ર્નોને તબક્કાવાર ઉકેલવા માટે યોજનાઓ બનાવવામાં આવી છે. શરૂઆતમાં 11,359 અતિક્રમણ કરનારાઓના દાવાઓની તપાસ કરવામાં આવી છે અને તેમાંથી 299 પાત્ર હોવાનું જાણવા મળ્યું છે; જોકે, તેમનું પુનર્વસન બાકી છે. બીજા તબક્કામાં, 13,486 અતિક્રમણ કરનારાઓના પ્રશ્ર્નો પર વિચારણા કરવામાં આવી રહી છે.

આરે કોલોની વિસ્તારમાં લગભગ 20 એકર જમીનમાં આદિવાસી પરિવારો માટે ’ગ્રાઉન્ડ પ્લસ વન’ મકાનો બનાવીને લગભગ 2,200 પરિવારોનું પુનર્વસન કરવાનો પ્રસ્તાવ છે. ઉપરાંત, પુનર્વસન માટે માર્ગ મોકળો કરવા માટે મુખ્ય પ્રધાનની કચેરીમાં એક બેઠકનું આયોજન કરવામાં આવ્યું છે.

નાઈકે એમ પણ કહ્યું કે રાષ્ટ્રીય ઉદ્યાનની બહારની વસાહતોમાં પાણી પુરવઠો, શૌચાલય વગેરે જેવી મૂળભૂત સુવિધાઓના સમારકામમાં કોઈ અવરોધ ન આવે તે માટે સંબંધિત વિભાગોને સૂચનાઓ આપવામાં આવશે.