ચંદીગઢ: પંજાબમાં આગામી વિધાનસભા ચૂંટણીઓ પહેલાં ડ્રગ્સની સમસ્યા ફરી એકવાર ચર્ચાના કેન્દ્રમાં આવી ગઈ છે. રાજ્યમાં નશાના વધતા કારોબારને લઈને કડક કાર્યવાહી કરવામાં આવી રહી છે, જેમાં એક ચોંકાવનારો કિસ્સો સામે આવ્યો છે. ફિરોઝપુરમાં શનિવારે પંજાબ પોલીસના જ એક કાઉન્ટર ઈન્ટેલિજન્સ યુનિટના ઈન્સ્પેક્ટર પાસેથી 3.35 કિલો હેરોઈન અને છ પિસ્તોલ મળી આવતા ખળભળાટ મચી ગયો છે. પોલીસે આરોપી પોલીસ અધિકારીની ધરપકડ કરીને કાયદેસરની કાર્યવાહી હાથ ધરી છે.
આ ગંભીર કેસમાં ફિરોઝપુરના કાઉન્ટર ઈન્ટેલિજન્સ યુનિટના ઇન્ચાર્જ બલદેવ સિંહની ધરપકડ કરવામાં આવી છે. પોલીસ દરોડા દરમિયાન તેમની પાસેથી 3.35 કિલો હેરોઈન, 6 પિસ્તોલ અને 6 મોબાઈલ ફોન જપ્ત કરવામાં આવ્યા છે. ડ્રગ્સ તસ્કરી સામે લડવાની જવાબદારી ધરાવતી યુનિટના જવાબદાર અધિકારી પર જ પ્રતિબંધિત પદાર્થો અને ગેરકાયદે હથિયારો રાખવાના ગંભીર આરોપો લાગતા સમગ્ર પોલીસ વિભાગમાં ચકચાર ફેલાઈ ગઈ છે.
ફિરોઝપુરના એસએસપીના જણાવ્યા અનુસાર, શુક્રવાર અને શનિવારની વચ્ચેની રાત્રે ગુપ્ત માહિતીના આધારે આ રેડ પાડવામાં આવી હતી. ઇન્સ્પેક્ટર બલદેવ સિંહ સાદા કપડામાં એક પ્રાઇવેટ કારમાં મુસાફરી કરી રહ્યા હતા, ત્યારે ફિરોઝપુર-મોગા રોડ પર આવેલા ફિરોઝશાહ ટોલ પ્લાઝા પાસેથી તેમને ઝડપી લેવામાં આવ્યા હતા. તેમની વિરુદ્ધ ઘલ્લ ખુર્દ પોલીસ સ્ટેશનમાં NDPS એક્ટ અને આર્મ્સ એક્ટની સંબંધિત કલમો હેઠળ ગુનો દાખલ કરવામાં આવ્યો છે.
આ ઘટનાએ કાયદો અને વ્યવસ્થા જાળવનાર સંસ્થાઓમાં સંગઠિત ડ્રગ નેટવર્કની સંડોવણી સામે ગંભીર સવાલો ખડા કર્યા છે. હાલ પોલીસ એ તપાસ કરી રહી છે કે આ હેરોઈન અને હથિયારોનો મૂળ સ્ત્રોત ક્યાંથી આવ્યો હતો, તેને ક્યાં પહોંચાડવામાં આવનાર હતો અને આ રેકેટમાં અન્ય કોણ-કોણ સામેલ છે. પંજાબ પોલીસ આ મામલાની ઊંડાણપૂર્વક તપાસ કરી રહી છે.
