નવી દિલ્હીઃ તૃણમુલ કૉંગ્રેસ પાર્ટી (ટીએમસી)માં હાલ બે ફાંટા પડી ગયા છે, પરંતુ હલચલ માત્ર ધારાસભ્ય સ્તર સુધી જ મર્યાદિત છે. તેનું કારણ એ છે કે બળવાખોર સાંસદો NCPI એટલે કે નેશનલ સિટિઝન્સ પાર્ટી ઓફ ઇન્ડિયામાં વિલીન થઈ ગયા હતા. જોકે, હજુ સુધી આ ભંગાણ પર આખરી મહોર લાગી નથી. આ દરમિયાન આ સાંસદોમાં સામેલ અને મમતા બેનર્જીની નજીકની ગણાતી સાયોની ઘોષની એક પોસ્ટે ચર્ચા જગાવી છે.
સાયોની ઘોષે સોશિયલ મીડિયા પર લખ્યું, 'તૂ ઇધર ઉધર કી ન બાત કર યે બતા કી કાફિલા ક્યોં લૂટા...' જોકે, તેમણે પોસ્ટમાં કોઈ પણ પક્ષ કે નેતાનું નામ લખ્યું નથી, પરંતુ એવી અટકળો છે કે આ મેસેજનો ઈશારો મમતા બેનર્જી જૂથ તરફ છે. ખાસ વાત એ છે કે બળવાખોર સાંસદ અને ધારાસભ્યો પણ અલગ-અલગ જોવા મળી રહ્યા છે. બંનેના નેતાઓ જુદા છે.
तू इधर उधर की न बात कर ये बता कि क़ाफ़िला क्यूँ लुटा …..
— Saayoni Ghosh (@sayani06) September 17, 2026
મમતા બેનર્જી જૂથ પર નિશાન સાધ્યું?
સાયોની ઘોષ અલગ થયા પછી પણ ટીએમસી વિરુદ્ધ કોઈ પણ નિવેદન આપવાથી બચતી રહી છે. તેમણે જાહેરમાં ક્યારેય પણ મમતા બેનર્જી કે પાર્ટી વિરુદ્ધ નિવેદન આપ્યું નથી. આ વખતે તેમનો આ મેસેજ ટાઇમિંગના કારણે વધુ ચર્ચામાં છે. એક તરફ જ્યાં ટીએમસીએ તેને કાયદા વિરુદ્ધ ગણાવ્યો છે, ત્યાં જ બળવાખોર ધારાસભ્યોએ તેનું સમર્થન કર્યું છે.
ટીએમસીએ શું કહ્યું?
લોકસભા સાંસદ કલ્યાણ બેનર્જીએ સ્પષ્ટ કર્યું કે, તેમનું જૂથ આ આદેશને સ્વીકારી રહ્યું નથી. તેમણે જણાવ્યું આ આદેશ કાયદાની વિરુદ્ધ છે. અમે તેને સ્વીકારતા નથી, તેમાં ઘણી કાનૂની ખામીઓ છે. આદેશમાં તથ્યોને ધ્યાને લેવાયા નથી, પરંતુ ક્યારેક તમારે એવી બાબતો પણ માનવી પડે છે, જે થોડા સમય માટે નિયમો, કાયદાઓ અને જોગવાઈઓ મુજબ હોતી નથી. અમે અમારો જવાબ આપીશું.
બળવાખોર જૂથ સમર્થનમાં
ધારાસભ્ય અખરુજ્જમા અંસારી જણાવ્યું કે, 'અમે ચૂંટણી પંચના આદેશનો સ્વીકાર કરીએ છીએ. સ્વાભાવિક છે કે, અમે 'જોડા ફૂલ' ચૂંટણી ચિહ્ન ઈચ્છતા હતા. પરંતુ પંચે હાલ પૂરતો વચગાળાનો આદેશ આપ્યો છે. અમને વિશ્વાસ છે કે ચૂંટણી પંચ જ્યારે પોતાનો અંતિમ ચુકાદો આપશે, ત્યારે અમને પક્ષનું સત્તાવાર અને મૂળ નામ તથા ચૂંટણી ચિહ્ન મળી જશે.
આગળ શું છે પ્રક્રિયા?
મહત્વની વાત એ છે કે આ સમગ્ર ઘટનાક્રમ પશ્ચિમ બંગાળની બે મોટી બેઠકો નંદીગ્રામ અને રેજીનગરની પેટાચૂંટણી પહેલાં બની રહ્યો છે. ચૂંટણી પંચે ગુરુવારે વચગાળાનો આદેશ જાહેર કર્યો અને સ્પષ્ટ કર્યું છે કે આ નિર્ણય આગામી ચૂંટણીને ધ્યાનમાં રાખીને લેવાયો છે. સાથે જ આ મામલે જ્યાં સુધી અંતિમ નિર્ણય ન આવે ત્યાં સુધી આ જ આદેશ અમલમાં રહેશે. આમ ચૂંટણી પંચનો આખરી નિર્ણય ન આવે ત્યાં સુધી બંનેમાંથી કોઈ પણ જૂથ 'ટીએમસી' નામ કે 'જોડા ફૂલ' ચિહ્નનો ઉપયોગ કરી શકશે નહીં.
