નવી દિલ્હીઃ બ્રિટનમાં એક પાકિસ્તાની શરણાર્થીને 18 વર્ષની યુવતી પર બળાત્કાર કરવાના ગુનામાં 10 વર્ષની જેલની સજા ફટકારવામાં આવી છે. આ ઘટના નોટિંગહામશાયરના એક પાર્કમાં બની હતી, જ્યાં યુવતી દારૂના નશામાં હતી. અદાલતે આરોપીને સમાજ માટે ખતરો ગણાવતા, સજા પૂરી થયા પછી પણ તેના પર વધુ ચાર વર્ષ સુધી ખાસ નજર રાખવાનો (એક્સટેન્ડેડ લાયસન્સ) આદેશ આપ્યો છે.

28 વર્ષનો શેરાજ મલિક 29 જૂન 2025ના રોજ સટન-ઇન-એશફિલ્ડના સટન લોન પાર્કમાં હાજર હતો. તે સમયે યુવતી તેના એક મિત્ર સાથે દારૂ પી રહી હતી. આ દરમિયાન તેની મુલાકાત મલિક અને તેના કેટલાક સાથીઓ સાથે થઈ હતી. ત્યારપછી યુવતીનો મિત્ર થોડીવાર માટે ત્યાંથી બહાર ગયો હતો અને તેણે મલિક તથા તેના સાથીઓને યુવતીનું ધ્યાન રાખવા માટે કહ્યું હતું.

સરકારી વકીલ (અભિયોજન પક્ષ)ના જણાવ્યા અનુસાર, મિત્રના ગયા પછી તરત જ મલિક યુવતીને પાર્કના એક સુમસામ ભાગમાં લઈ ગયો અને તેની સાથે બળાત્કાર કર્યો. યુવતીએ ઘણી વાર તેનો વિરોધ કર્યો, પરંતુ આરોપી રોકાયો નહીં. અહેવાલ મુજબ, આ ઘટના પછી મલિકે યુવતીને પૂછ્યું, "શું તને મજા આવી?"

યુવતી નશામાં હતી, આરોપીએ ઉઠાવ્યો ફાયદો

કેસની સુનાવણી દરમિયાન મલિકે દાવો કર્યો હતો કે બંને વચ્ચે સંબંધ પરસ્પર સંમતિથી બંધાયા હતા. પરંતુ જાન્યુઆરીમાં જ્યુરીએ તેને બળાત્કારના બે ગુનામાં દોષિત જાહેર કર્યો. પીડિતાએ અદાલતમાં જણાવ્યું કે તે સમયે તે ખૂબ જ ડરેલી હતી. તેણે કહ્યું, "મને 'ના' કહેવામાં પણ ડર લાગતો હતો." કોર્ટે સ્વીકાર્યું કે યુવતી નશામાં હતી અને ખૂબ જ લાચાર હાલતમાં હતી, જેનો આરોપીએ ફાયદો ઉઠાવ્યો.

યુવતીના માથા અને ચહેરા પર હુમલો કરવાનો આરોપ

સજા સંભળાવતા જજ સાયમન એશ કેસીએ જણાવ્યું કે મલિકે જાણીજોઈને એવી યુવતીને નિશાન બનાવી જે નશામાં હતી, એકલી હતી અને આસપાસના લોકોને સરખી રીતે ઓળખતી નહોતી. અદાલતે એ પણ નોંધ્યું કે યુવતીએ વિરોધ કર્યો ત્યારે આરોપીએ તેના માથા અને ચહેરા પર હુમલો કર્યો હતો. ઘટના પછી તેણે પીડિતા માટે અપમાનજનક શબ્દોનો પણ ઉપયોગ કર્યો હતો.