મુંબઈ: રાજ્ય સરકારની પ્રધાનમંડળની બેઠકમાં રમતગમત, આરોગ્ય, કાપડ ઉદ્યોગ અને વિધિ અને ન્યાય વિભાગ સાથે સંબંધિત અનેક મહત્વપૂર્ણ અને નીતિગત નિર્ણયો લેવામાં આવ્યા. રાજ્યના ગુણવંત ખેલાડીઓને સરકારી નોકરીઓમાં મળતા અનામત અંગે સુધારેલી નીતિ લાગુ કરવાનો મોટો નિર્ણય પણ આ બેઠકમાં લેવામાં આવ્યો.
આ ઉપરાંત જાહેર આરોગ્ય વ્યવસ્થાને વધુ સક્ષમ બનાવવા માટે એશિયન ડેવલપમેન્ટ બેંક (એડીબી)ના સહયોગથી નવો પ્રોજેક્ટ હાથ ધરવા અને સોલાપુર જિલ્લાના માઢા ખાતે નવી સેશન કોર્ટ સ્થાપવા માટે મંજૂરી આપવામાં આવી.
રાજ્યના સફળ અને ગુણવંત ખેલાડીઓને સરકારી, અર્ધસરકારી અને અન્ય ક્ષેત્રોની નોકરીઓમાં મળતા ૫ ટકા અનામત અંગે સુધારેલી નીતિ લાગુ કરવા માટે પ્રધાનમંડળે મંજૂરી આપી. આ નવી સુધારેલી નીતિને કારણે અગાઉના તમામ સરકારી નિર્ણયો, સરકારી શુદ્ધિપત્રો, પરિપત્રો અને સંબંધિત પત્રો સંપૂર્ણપણે રદ કરવામાં આવ્યા છે.
આ ઉપરાંત જાહેર આરોગ્ય વ્યવસ્થાને વધુ મજબૂત, અદ્યતન અને ટેકનોલોજી-ફ્રેન્ડલી બનાવવા માટે પ્રગતિ પ્રોજેક્ટ હાથ ધરવામાં આવશે. આ પ્રોજેક્ટ ૨૦૨૬ થી ૨૦૩૧ સુધીના પાંચ વર્ષના સમયગાળા દરમિયાન અમલમાં મૂકવામાં આવશે. આ માટે એડીબી પાસેથી લોન લેવાની અને તેમાં રાજ્ય સરકારનો હિસ્સો સામેલ કરવાની મંજૂરી આપવામાં આવી છે.
સોલાપુર જિલ્લાના માધા ખાતે એક નવી જિલ્લા અને વધારાની સેશન્સ કોર્ટ સ્થાપના કરવામાં આવશે. આ અદાલત માટે જરૂરી જગ્યાઓ બનાવવા અને ખર્ચની જોગવાઈ કરવા માટે મંજૂરી આપવામાં આવી હતી.
ટેક્સટાઇલ વિભાગ હેઠળ 'હ્યોસંગ ઇન્ડિયા પ્રાઇવેટ લિમિટેડ'ને કેપિટલ ગ્રાન્ટ આપવાની મંજૂરી આપવામાં આવી. વિવિધ જમીનો અંગે મહેસૂલ વિભાગના મહત્વના નિર્ણયો નીચે મુજબ છે. મુંબઈના 'કૈવલ્યધામ ઈશ્વરદાસ ચૂન્નીલાલ યોગિક સેન્ટર'ની જમીનના લીઝનું રાહત દરે નવનીકરણ કરવાની મંજૂરી આપવામાં આવી.
ચેમ્બુર સ્થિત 'ભિક્ખુ સંઘ યુનાઇટેડ બુદ્ધિસ્ટ મિશન' નામની સંસ્થાને તેમના વર્તમાન કબજા હેઠળની જમીન ફાળવવાનો નિર્ણય લેવામાં આવ્યો. નાગપુર જિલ્લાના કોરાડી ખાતે તીર્થક્ષેત્ર વિકાસ યોજના હેઠળ વિકસાવવામાં આવી રહેલી સરકારી જમીન 'શ્રી મહાલક્ષ્મી જગદંબા સંસ્થાન'ને ટ્રાન્સફર કરવાની મંજૂરી આપવામાં આવી.
