બોગાટા: દક્ષિણ અમેરિકાના દેશ કોલંબિયામાં એક શક્તિશાળી ભૂકંપ આવ્યો હતો. જેના કારણે લોકોમાં ગભરાટ ફેલાયો હતો. આ અંગે મળતી માહિતી મુજબ 20 લોકોના મોત થયા છે. આ ભૂકંપથી અનેક ઇમારતોને નુકસાન થયું હતું. ભૂકંપના લીધે મોટી સંખ્યામાં લોકો તેમના ઘરો અને ઓફિસોમાંથી બહાર દોડી આવ્યા હતા.
ભૂકંપની તીવ્રતા 6.6 નોંધાઈ હતી
આ ભૂકંપની અસર રાજધાની બોગાટામાં જ નહીં પરંતુ પડોશી વેનેઝુએલા અને ઇક્વાડોરમાં પણ જોવા મળી હતી.કોલંબિયાના નેશનલ યુનિટ ફોર ડિઝાસ્ટર રિસ્ક મેનેજમેન્ટ (UNGRD) અનુસાર, ભૂકંપનું કેન્દ્ર બોગાટાથી લગભગ 400 કિલોમીટર પશ્ચિમમાં સાન જોસ ડેલ પાલ્મર નજીક હતું. ભૂકંપની તીવ્રતા 6.6 નોંધાઈ હતી.
ભૂકંપને કારણે અનેક લોકો ઘાયલ થયા
અધિકારીઓ હાલમાં અસરગ્રસ્ત વિસ્તારોમાં નુકસાનનું મૂલ્યાંકન કરી રહ્યા છે. પ્રારંભિક અહેવાલો દર્શાવે છે કે ઘણી ઇમારતોને માળખાકીય નુકસાન અને કેટલાક સ્થળોએ લોકોને ઇજાઓ થઈ છે. ચોકોના ગવર્નર નુબિયા કેરોલિના કોર્ડોબા કુરીએ પુષ્ટિ કરી છે કે ભૂકંપને કારણે અનેક લોકો ઘાયલ થયા છે. પ્રાંતીય રાજધાની ક્વિબ્ડોમાં પણ ઇમારતોને નુકસાન થયું હોવાના અહેવાલ છે.
વહીવટીતંત્ર નુકસાન અને ઘાયલો અંગે માહિતી એકત્રિત કરી રહ્યું છે
આ ઉપરાંત અધિકારીઓએ લોકોને આફટરશોક અંગે સતર્ક રહેવાની સલાહ આપી છે. સ્થાનિક સત્તાવાળાઓ અને આપત્તિ વ્યવસ્થાપન એજન્સીઓ ભૂકંપ પછી પરિસ્થિતિ પર નજીકથી નજર રાખી રહ્યા છે. આ અસરગ્રસ્ત વિસ્તારોમાં ઇમારતો અને માળખાગત સુવિધાઓને થયેલા નુકસાનનું મૂલ્યાંકન કરવા માટે નિરીક્ષણ ચાલી રહ્યું છે. હાલમાં, વહીવટીતંત્ર નુકસાન અને ઘાયલો અંગે વધુ માહિતી એકત્રિત કરી રહ્યું છે.
