કોલંબોઃ શ્રી લંકાના ક્રિકેટ બોર્ડે એક ખાસ કારોબારી સમિતિની બેઠક બોલાવી છે, જેથી દેશના રાષ્ટ્રપતિ અનુરા કુમારા દિસાનાયકેના નિર્દેશ પર વર્તમાન વડા શમ્મી સિલ્વાની હકાલપટ્ટી પર ઔપચારિક મહોર લગાવી શકાય. દિસાનાયકે પહેલાથી જ સ્પષ્ટ કરી દીધું છે કે તેઓ ઇચ્છે છે કે સિલ્વા ક્રિકેટના સંચાલન માટે એક નવા વહીવટી અધિકારીને સ્થાન આપે.

કારોબારી સમિતિના સભ્યો સામૂહિક રીતે રાજીનામું આપવાનો નિર્ણય લઈ શકે છે, જેનાથી પદાધિકારીઓ માટે નવી ચૂંટણી યોજાઈ શકે. સિલ્વાનો વર્તમાન કાર્યકાળ મે 2027 સુધી છે પરંતુ તેમને પદ છોડવા માટે દબાણનો સામનો કરવો પડી રહ્યો છે.

ખેલાડીઓના અસંતોષ અને છેલ્લા કેટલાક વર્ષોમાં રાષ્ટ્રીય ટીમના નબળા પ્રદર્શનને કારણે સરકાર સિલ્વાને તેમના પદ પરથી હટાવવા માટે આતુર છે. 2019માં સભ્ય ક્લબોના બહુમતી મતોથી શ્રીલંકન ક્રિકેટ બોર્ડના અધ્યક્ષ બનનારા સિલ્વા 2021, 2023 અને 2025માં ફરીથી બિનહરીફ ચૂંટાયા હતા. સિલ્વાએ 2025માં ભારતના જય શાહ પછી એશિયન ક્રિકેટ કાઉન્સિલના પ્રમુખ તરીકે પણ સેવા આપી હતી.

જોકે, એ જોવું રસપ્રદ રહેશે કે આઈસીસી સમગ્ર પરિસ્થિતિને કેવી રીતે જુએ છે કારણ કે વિશ્વ સંસ્થાના ચાર્ટરમાં સ્પષ્ટપણે કહેવામાં આવ્યું છે કે કોઈ પણ સરકારી દખલગીરી સ્વીકારવામાં આવશે નહીં.