નવી દિલ્હીઃ પશ્ચિમ એશિયા (મિડલ ઈસ્ટ)ની કટોકટી અને કાચા તેલના ભાવમાં વધારા વચ્ચે, ભારતીય રૂપિયો માત્ર ડૉલર સામે જ નથી નબળો પડ્યો, પણ ચીનના ચલણ 'યુઆન' સામે પણ ગગડ્યો છે. આના કારણે ભારતમાં મોંઘવારી વધવાનો ખતરો ઊભો થયો છે, જ્યારે ચીનને આ સ્થિતિનો ફાયદો મળી રહ્યો છે.

જો જાન્યુઆરીથી અત્યાર સુધીની વાત કરીએ તો, યુઆનની સરખામણીમાં રૂપિયો 6 થી 8 ટકા જેટલો તૂટ્યો છે. જાન્યુઆરી મહિનામાં 1 યુઆનની કિંમત ₹12.8 થી ₹13 ની આસપાસ હતી, જે હવે ઘટીને 1 યુઆન બરાબર ₹14 થી ₹14.2 થઈ ગઈ છે. આનાથી સ્પષ્ટ થાય છે કે હવે ભારતે ચીનથી સામાન ખરીદવા માટે 8 થી 10 ટકા વધુ ચૂકવવા પડશે, જેના કારણે ચીની વસ્તુઓ મોંઘી થઈ જશે.

2026માં કેટલી આયાતનો અંદાજ?

અત્યાર સુધી ચીનથી થયેલી આયાતના આંકડા જોઈએ તો, 2025ની સરખામણીમાં આયાત વધવાનો અંદાજ દેખાઈ રહ્યો છે. ઇલેક્ટ્રોનિક્સ, સોલર સાધનો (સોલર ઇક્વિપમેન્ટ) અને મશીનરીની આયાતમાં ઝડપથી વધારો થયો છે. જો આ જ રીતે આયાત થતી રહી, તો 2026માં ચીનથી આયાત 125 થી 135 અબજ ડૉલર સુધી પહોંચી શકે છે.

કેટલો વધારાનો બોજ પડી શકે?

ધારી લો કે વર્ષ 2025માં ચીનથી આયાત આશરે 120 અબજ ડૉલર હતી અને યુઆનની સરખામણીમાં રૂપિયો 7 ટકા નબળો પડ્યો, તો ભારત પર 8.4 અબજ ડૉલરનો વધારાનો બોજ પડ્યો. જો આ રકમને રૂપિયામાં ગણીએ તો, ભારતને આશરે 70,000 થી 75,000 કરોડ રૂપિયાનો વધારાનો ખર્ચ થશે.

કેમ ગગડ્યો રૂપિયો?
 
ભારતની ચીનથી આયાત વધવી

આનું સૌથી મોટું કારણ એ છે કે ભારત, ચીનમાંથી આયાત વધારે કરે છે અને નિકાસ ઓછી કરે છે. નાણાકીય વર્ષ 2025માં ભારતની ચીનથી આયાત 115 અબજ ડૉલર રહી હતી, જ્યારે નિકાસ માત્ર 14.5 અબજ ડૉલરની જ થઈ હતી. જેના કારણે વેપાર ખાધ (ટ્રેડ ડેફિસિટ) વધી છે અને યુઆનની સરખામણીમાં રૂપિયો ગગડ્યો છે.

ડૉલરમાં મજબૂતાઈ

ડૉલરમાં વધુ મજબૂતાઈ જોવા મળી છે. તાજેતરમાં જ ડૉલર સામે રૂપિયો 96.8 ના રેકોર્ડ નીચલા સ્તરે પહોંચી ગયો હતો. બીજી તરફ, ચીનના ચલણે મજબૂતાઈ બતાવી છે. આ વર્ષે ચીનનું ચલણ (યુઆન) ડૉલરની સરખામણીમાં 2 થી 3 ટકા જેટલું મજબૂત થયું છે.