નાસિકઃ નાસિકમાં TCS કર્મચારી સાથે જોડાયેલા કથિત યૌન શોષણ અને ધર્માંતરણના મામલે હવે નવો રાજકીય વળાંક આવ્યો છે. આરોપી નિદા ખાનને આશ્રય આપવાના આરોપસર AIMIM ના કોર્પોરેટર મતીન પટેલના ઘર અને ઓફિસ પર મહાનગરપાલિકાએ બુલડોઝરની કાર્યવાહી શરૂ કરી દીધી છે. આ કાર્યવાહી દરમિયાન મહિલાઓએ અધિકારીઓને ફૂલ અને બંધારણની નકલ આપીને પોતાનો વિરોધ નોંધાવ્યો હતો.
મતીન પટેલ પર નોંધાયો હતો કેસ
પોલીસના જણાવ્યા અનુસાર, મતીન પટેલ પર આરોપ છે કે તેણે આરોપી નિદા ખાનને નારેગાંવ સ્થિત કૌસર પાર્ક વિસ્તારમાં આવેલા પોતાના ઘરમાં આશ્રય આપ્યો હતો. આ મામલે નાસિક પોલીસે તેની વિરુદ્ધ ભારતીય ન્યાય સંહિતા (BNS) ની કલમ 249 હેઠળ ગુનો નોંધ્યો છે. નિદા ખાનની ધરપકડ બાદ પોલીસે મતીન પટેલની પણ અટકાયત કરી પૂછપરછ કરી હતી.
બીજી તરફ, મહાનગરપાલિકાએ દાવો કર્યો છે કે કોર્પોરેટરના ઘર અને ઓફિસનું બાંધકામ નિયમો વિરુદ્ધ કરવામાં આવ્યું છે. આ અંગે ત્રણ દિવસ પહેલા નોટિસ આપવામાં આવી હતી અને નિર્ધારિત સમયમર્યાદા પૂરી થયા બાદ, બુધવારે સવારે પાલિકાની ટીમ ચુસ્ત પોલીસ બંદોબસ્ત સાથે કાર્યવાહી કરવા પહોંચી હતી.
મહિલાઓએ કર્યું 'બુલડોઝર ટીમ'નું સ્વાગત
જોકે, આ કાર્યવાહી દરમિયાન ત્યાં એક અલગ જ દ્રશ્ય જોવા મળ્યું હતું. વિસ્તારની કેટલીક મહિલાઓ મહાનગરપાલિકાના અધિકારીઓ સામે ફૂલો લઈને પહોંચી હતી અને તેમનું સ્વાગત કર્યું હતું. મહિલાઓએ અધિકારીઓને બંધારણની નકલો પણ ભેટમાં આપી હતી. તેમનું કહેવું હતું કે કાયદાનું પાલન થવું જોઈએ, પરંતુ કાર્યવાહી બંધારણ અને ન્યાયિક પ્રક્રિયાની મર્યાદામાં રહીને જ કરવી જોઈએ.
"મહિલાઓના આ અનોખા વિરોધે આખા વિસ્તારનું ધ્યાન ખેંચ્યું હતું. ઘટનાસ્થળે મોટી સંખ્યામાં પોલીસકર્મીઓ તૈનાત કરવામાં આવ્યા હતા અને સમગ્ર વિસ્તારમાં તણાવભર્યો માહોલ રહ્યો હતો. બુલડોઝરની કાર્યવાહી દરમિયાન સ્થાનિક લોકોની ભીડ પણ એકઠી થઈ ગઈ હતી, જેના કારણે તંત્ર ખૂબ જ સતર્ક જોવા મળ્યું હતું."
કોર્પોરેશનના કર્મતારીઓને મહિલાઓએ આપ્યું બંધારણ
"આ કાર્યવાહીને લઈને રાજકીય નિવેદનબાજી પણ તેજ બની છે. AIMIM નેતાઓએ તેને રાજકીય દબાણ હેઠળ કરવામાં આવેલી કાર્યવાહી ગણાવી છે, જ્યારે તંત્રનું કહેવું છે કે ગેરકાયદેસર બાંધકામ વિરુદ્ધ નિયમો મુજબ કાર્યવાહી કરવામાં આવી રહી છે અને કાયદાની ઉપરવટ જવાનો કોઈને અધિકાર નથી."
"હાલમાં પોલીસ આ સમગ્ર કેસની તપાસ વિવિધ પાસાઓથી કરી રહી છે. અધિકારીઓનું કહેવું છે કે આરોપી નિદા ખાનની પૂછપરછમાં મળેલા ઇનપુટ્સના આધારે આગળની કાર્યવાહી પણ થઈ શકે છે. બીજી તરફ, શહેરમાં થયેલી બુલડોઝરની કાર્યવાહી અને મહિલાઓ દ્વારા બંધારણની નકલ આપીને કરવામાં આવેલા વિરોધની ચર્ચા સતત ચાલી રહી છે."
