મુંબઈ : મહારાષ્ટ્રમાં દુકાળની ગંભીર સ્થિતિ વચ્ચે દુકાળગ્રસ્ત ખેડૂતોના પરિવારો માટે શિવસેનાએ મદદનો હાથ લંબાવવાની જાહેરાત કરી છે. મહારાષ્ટ્રના નાયબ મુખ્ય પ્રધાન એકનાથ શિંદેએ શનિવારે જણાવ્યું કે દુકાળથી અસરગ્રસ્ત એવા ખેડૂતોના પરિવારમાં લગ્ન પ્રસંગ હોય તો શિવસેના તરફથી જરૂરી આર્થિક મદદ કરવામાં આવશે.
એકનાથ શિંદેએ જણાવ્યું હતું કે દુકાળગ્રસ્ત વિસ્તારોમાં ખેડૂતો પહેલેથી જ અનેક મુશ્કેલીઓનો સામનો કરી રહ્યા છે. પાક નિષ્ફળ જવાથી અને દેવાના બોજને કારણે બાળકોના લગ્ન માટે જરૂરી રકમ એકઠી કરવી પણ ઘણા ખેડૂતો માટે મુશ્કેલ બની રહી છે. આવી સ્થિતિમાં લગ્નનો વધારાનો આર્થિક બોજ પરિવારો માટે ચિંતાનું કારણ બની રહ્યો છે.
શિંદેએ કહ્યું કે દુકાળ, પાક નિષ્ફળતા અને દેવાના કારણે કેટલાક ખેડૂતો અત્યંત ગંભીર પગલું ભરવા સુધી પહોંચી જાય છે. આવા પરિવારો પરનો આર્થિક બોજ ઘટાડવા અને તેમને મદદ મળી રહે તે હેતુથી શિવસેનાએ આ પહેલ શરૂ કરી છે. દુકાળગ્રસ્ત ખેડૂતોના પરિવારમાં લગ્નનું આયોજન હોય તેવા લોકો સ્થાનિક ચૂંટાયેલા પ્રતિનિધિઓ અથવા શિવસેનાના સ્થાનિક પદાધિકારીઓનો સંપર્ક કરીને જરૂરી સહાય મેળવી શકશે.
મહારાષ્ટ્ર સરકાર દ્વારા શનિવારે જાહેર કરવામાં આવેલા નિર્ણય મુજબ રાજ્યના કુલ 358 તાલુકામાંથી 265 તાલુકાને દુકાળગ્રસ્ત જાહેર કરવામાં આવ્યા છે. આ તાલુકાઓ રાજ્યના કુલ ભૌગોલિક વિસ્તારના આશરે 75 ટકા વિસ્તારમાં આવેલા છે.
દુકાળને કારણે ખેડૂતો સામે પાક નુકસાન, પાણીની અછત, દેવું અને પરિવારના ખર્ચ જેવા અનેક પડકારો ઊભા થયા છે. બાળકોના લગ્નનો ખર્ચ પણ આવા પરિવારો માટે મોટો આર્થિક બોજ બની શકે છે. આ પરિસ્થિતિને ધ્યાનમાં રાખીને શિવસેના દ્વારા લગ્ન પ્રસંગે સહાય આપવાની જાહેરાત કરવામાં આવી છે. શિંદેએ દુકાળગ્રસ્ત ખેડૂતોના પરિવારોને સ્થાનિક શિવસેના કાર્યકરો અને પદાધિકારીઓનો સંપર્ક કરવા જણાવ્યું છે. સરકાર દ્વારા રાજ્યના મોટા ભાગના વિસ્તારમાં દુકાળ જાહેર કરવામાં આવ્યા બાદ ખેડૂતો અને તેમના પરિવારો માટે આર્થિક સહાયનો મુદ્દો પણ રાજકીય સ્તરે ગરમાયો છે.
