અમદાવાદઃ શહેરમાં યોજાનારી કોમનવેલ્થ ગેમ્સ 2030ની તૈયારીઓ શરૂ કરી દેવામાં આવી છે. જેના ભાગ રૂપે અમદાવાદના એસ.જી. હાઈવેને  સિક્સ-લેન સિગ્નલ-ફ્રી કોરિડોર બનાવવામાં આવશે. આ માટે ₹1000 કરોડનો ખર્ચ થશે. તેમજ એસ.જી. હાઈવે પર ટ્રાફિકમાંથી ટૂંક સમયમાં મુક્તિ મળશે. નિરમા યુનિવર્સિટી અને કર્ણાવતી ક્લબ પાસેના ફ્લાયઓવરનું કામ અંતિમ તબક્કામાં છે. 

44.3 કિમી લાંબો છે એસ.જી. હાઈવે

44.3 કિમી લાંબા એસ.જી. હાઈવે પર નિરમા યુનિવર્સિટી અને કર્ણાવતી ક્લબ પાસે બે નવા ફ્લાયઓવરનું કામ, તેમજ નર્મદા કેનાલ પરના ફ્લાયઓવરના વિસ્તરણનું કામ આ વર્ષના અંત સુધીમાં પૂર્ણ થવાની ધારણા છે, જેનાથી હજારો વાહનચાલકોને મોટી રાહત મળશે.

10 કટ અને 8 ટ્રાફિક સિગ્નલ કરાશે બંધ

નિરમા યુનિવર્સિટીથી ગોતા ફ્લાયઓવર અને નર્મદા કેનાલ ફ્લાયઓવરનું કામ જુલાઈના અંત સુધીમાં પૂર્ણ થવાની શક્યતા છે, જ્યારે YMCA ક્લબને કર્ણાવતી ક્લબ સાથે જોડતો ફ્લાયઓવર ડિસેમ્બર સુધીમાં પૂર્ણ થવાનું આયોજન છે. રાજ્ય સરકારે 2030માં યોજાનારી કોમનવેલ્થ ગેમ્સને ધ્યાનમાં રાખીને અમદાવાદ અને ગાંધીનગર વચ્ચેની કનેક્ટિવિટી સુધારવા માટે આ મહત્વાકાંક્ષી પ્રોજેક્ટ હાથ ધર્યો છે. સમગ્ર એસ.જી. હાઈવે ડેવલપમેન્ટ પ્રોજેક્ટનો અંદાજિત ખર્ચ આશરે ₹1,000 કરોડ છે. આ રસ્તાઓ બંને શહેરો વચ્ચે ભારે ટ્રાફિક વહન કરતા અત્યંત મહત્વના વિસ્તારો છે. હાલમાં ચાલી રહેલા બાંધકામને કારણે અહીં ભારે ટ્રાફિક જામ સર્જાય છે, જેના લીધે પીક અવર્સ દરમિયાન આ સેક્શન પસાર કરવામાં લોકોને 40 થી 45 મિનિટ જેટલો સમય લાગે છે.

રાજ્ય સરકારના એક વરિષ્ઠ અધિકારીએ જણાવ્યું હતું કે, આ હાઈવેને સિક્સ-લેન, સિગ્નલ-ફ્રી કોરિડોરમાં ફેરવવામાં આવશે. યોજના મુજબ, હાલના 10 કટ અને 8 ટ્રાફિક સિગ્નલ બંધ કરવામાં આવશે અને તેના બદલે યુ-ટર્ન બનાવવામાં આવશે. તેનાથી મુસાફરીનો સમય ઘટશે.

આઈકોનિક રોડ તરીકે વિકસાવવામાં આવશે

હાઈવેની બંને બાજુ ત્રણ-ત્રણ લેન હશે અને તેને એક 'આઈકોનિક રોડ' તરીકે વિકસાવવામાં આવશે. આ ઉપરાંત, અમદાવાદ મ્યુનિસિપલ કોર્પોરેશન દ્વારા સર્વિસ રોડને પણ અપગ્રેડ કરવામાં આવશે, જેમાં ફૂટપાથ, વૃક્ષારોપણ, કિયોસ્ક, સાયકલ ટ્રેક, શૌચાલય અને ઇવી (EV) ચાર્જિંગ સ્ટેશન જેવી સુવિધાઓ પૂરી પાડવામાં આવશે. દરમિયાન, રાજ્ય સરકારે અમદાવાદના ભાટ સર્કલ અને ગાંધીનગરના કોબા સર્કલ વચ્ચેના નર્મદા કેનાલ બ્રિજને પણ 12 લેન સુધી પહોળો કરવાની દરખાસ્ત કરી છે. ગાંધીનગરથી એસવીપી (SVP) ઇન્ટરનેશનલ એરપોર્ટ સુધી અવરોધ રહિત કનેક્ટિવિટી સુનિશ્ચિત કરવા માટે હાલના રોડની બંને બાજુએ બે સમાંતર બ્રિજ બનાવવાની દરખાસ્ત કરવામાં આવી છે.

આ બ્રિજ પ્રોજેક્ટનો અંદાજિત ખર્ચ ₹37.33 કરોડ છે. દરખાસ્ત મુજબ, વર્તમાન બ્રિજની સાથે આશરે 1,000 મીટર લાંબા અને 15 મીટર પહોળા બે સમાંતર બ્રિજ બાંધવામાં આવશે. કેનાલની અંદર બાંધકામની કામગીરી સરળ બનાવવા માટે સ્પેશિયલાઇઝડ પોન્ટૂન મેથડનો ઉપયોગ કરવામાં આવશે. આ પદ્ધતિમાં પાણી પર તરતા પ્લેટફોર્મનો ઉપયોગ કરીને ભારે પિલિંગ કામ કરવામાં આવે છે, જે સ્ટ્રક્ચરને મજબૂત પાયો પૂરો પાડે છે.