રાજકોટઃ રાજકોટ જિલ્લામાં મહેસૂલી કર્મચારી મંડળ દ્વારા વિવિધ પડતર પ્રશ્નો અને 14 જેટલી વિવિધ માંગણીઓને લઈને માસ CL કાર્યક્રમ જાહેર કરવામાં આવતા જિલ્લાના મહેસૂલી કર્મચારીઓ આજે માસ CL પર ઉતર્યા હતા. કર્મચારીઓ રાજકોટ ખાતે એકત્ર થઈ પોતાની માંગણીઓ અંગે સરકાર સમક્ષ રજૂઆત કરી હતી.

મહેસૂલી કર્મચારી મંડળના મહેશ કરંગીયાએ જણાવ્યું હતું કે નવીન મહેસૂલી તલાટીઓના જોબ ચાર્ટમાં સુધારા-વધારા કરવા સહિત કુલ 14 પ્રકારની માંગણીઓ સરકાર સમક્ષ રજૂ કરવામાં આવી હતી. મહેસૂલી કર્મચારીઓની મુશ્કેલીઓનું સરકાર દ્વારા સુખદ નિરાકરણ લાવવામાં આવે તેવી માંગ કરવામાં આવી છે.

‘રાત-દિવસ જોયા વગર કામગીરી કરીએ છીએ’

મહેશ કરંગીયાએ જણાવ્યું હતું કે મહેસૂલી તંત્ર દ્વારા ચોમાસા દરમિયાન પૂર જેવી આપત્તિ હોય, ચૂંટણીની કામગીરી હોય કે કોરોના જેવી વિકટ પરિસ્થિતિ હોય, કર્મચારીઓએ ખડેપગે રહી કામગીરી કરી છે. કોઈપણ પ્રકારની ડિઝાસ્ટર કામગીરી આવે ત્યારે પણ કર્મચારીઓ સરકારની સૂચના મુજબ કામગીરી કરવા માટે તૈયાર રહે છે.

તેમણે કહ્યું હતું કે કર્મચારીઓ સરકારની સૂચના મુજબ દિવસ-રાત જોયા વગર કામગીરી કરતા આવ્યા છે અને આગળ પણ કરતા રહેશે. જોકે, કર્મચારીઓની પોતાની પડતર મુશ્કેલીઓનું પણ સરકાર દ્વારા યોગ્ય રીતે નિરાકરણ કરવામાં આવે તેવી અપેક્ષા છે.

નવીન મહેસૂલી તલાટીઓના જોબ ચાર્ટમાં સુધારાની માંગ

મહેસૂલી કર્મચારીઓની 14 માંગણીઓ પૈકી નવીન મહેસૂલી તલાટીઓના જોબ ચાર્ટમાં જરૂરી સુધારા-વધારા કરવાની માંગ મુખ્ય છે. આ ઉપરાંત વર્ષ 2012ના નાયબ મામલતદારોને મળવાપાત્ર લાભો આપવા અંગે પણ રજૂઆત કરવામાં આવી છે.

જિલ્લાની બહાર પ્રમોશનથી અન્ય જિલ્લાઓમાં મુકાયેલા કર્મચારીઓને તેમની મૂળ જગ્યાએ જગ્યા ઉપલબ્ધ હોય અને સમાવેશ કરી શકાય તેમ હોય તો તેમને મૂળ જિલ્લામાં સમાવવા અંગે પણ કર્મચારીઓએ માંગણી કરી છે.

‘સરકાર અમારી મુશ્કેલીઓનું નિરાકરણ લાવે’

મહેશ કરંગીયાએ જણાવ્યું હતું કે મહેસૂલી કર્મચારી મંડળની તમામ 14 માંગણીઓ મહત્વની છે અને સરકાર દ્વારા આ માંગણીઓનો સહાનુભૂતિપૂર્વક વિચાર કરી યોગ્ય નિરાકરણ લાવવામાં આવે તેવી તેમની વિનંતી છે.

આગામી દિવસોમાં મહામંડળ દ્વારા જે કાર્યક્રમો જાહેર કરવામાં આવશે તેની સૂચના મુજબ મહેસૂલી કર્મચારીઓ આગળની કામગીરી કરશે.