વૃંદાવન: સંત પ્રેમાનંદ મહારાજ સાથે જોડાયેલા શિષ્ય રસિક દુલારી શરણના મોતના આઠ દિવસ બાદ શ્રી હિત રાધા કેલી કુંજ ટ્રસ્ટ તરફથી જાહેર નિવેદન આપવામાં આવ્યું હતું. 25 સપ્ટેમ્બર, 2026ના રોજ થયેલા આ મોતને લઈને સોશિયલ મીડિયા પર અનેક પ્રકારના દાવા અને ચર્ચાઓ ચાલી રહી છે. ત્યારે આશ્રમે શ્રદ્ધાળુઓ અને સામાન્ય લોકોને અફવાઓ પર વિશ્વાસ ન કરવા તથા પોલીસ તપાસના અંતિમ પરિણામની રાહ જોવા અપીલ કરી છે. 

'પોલીસને સંપૂર્ણ સહકાર'
ટ્રસ્ટે 3 ઓક્ટોબરે જાહેર કરેલા નિવેદનમાં ઘટનાને લઈને દુઃખ વ્યક્ત કર્યું હતું. સાથે જ સ્પષ્ટ કર્યું કે સમગ્ર મામલાની તપાસ પોલીસ-વહીવટીતંત્ર દ્વારા કરવામાં આવી રહી છે અને નિષ્પક્ષ તપાસમાં આશ્રમ તરફથી સંપૂર્ણ સહયોગ આપવામાં આવી રહ્યો છે. ટ્રસ્ટનું કહેવું છે કે તપાસ પૂર્ણ થયા બાદ જ ઘટનાના વાસ્તવિક તથ્યો સ્પષ્ટ થઈ શકશે. રસિક દુલારી શરણનું મૂળ નામ દીપક લોધી હતું. 

તપાસ પૂર્ણ થવા સુધી સંયમ રાખવાની અપીલ 
આશ્રમે શ્રદ્ધાળુઓ, સાધકો અને સામાન્ય લોકોને ખાસ અપીલ કરી છે કે તપાસ પૂર્ણ ન થાય ત્યાં સુધી કોઈપણ અપુષ્ટ માહિતી, અફવા કે અનુમાનના આધારે નિવેદન કે પ્રચાર ન કરે. ટ્રસ્ટે જણાવ્યું કે આવા બિનઆધારભૂત દાવાઓથી પૂજ્ય પ્રેમાનંદ મહારાજ અથવા આશ્રમની છબીને નુકસાન પહોંચી શકે છે. તેથી સત્તાવાર તપાસના નિષ્કર્ષ સુધી સંયમ જાળવવા માટે કહેવામાં આવ્યું છે. 

ક્યારે થયું મૃત્યુ? 
મળતી માહિતી અનુસાર, દીપક લોધી દીક્ષા લીધા બાદ ‘રસિક દુલારી શરણ’ નામથી ઓળખાતા હતા. તેઓ વૃંદાવનમાં પ્રેમાનંદ મહારાજ સાથે જોડાયેલા ગુરુ કૃપા કુંજ આશ્રમમાં રહેતા હતા. 25 સપ્ટેમ્બરે તેઓ ચોથા માળેથી નીચે પડ્યા બાદ ગંભીર રીતે ઘાયલ થયા હતા અને સારવાર માટે હોસ્પિટલ લઈ જવામાં આવ્યા હતા, જ્યાં સારવાર દરમિયાન તેમનું મોત થયું હતું. પોલીસ આ મામલે આત્મહત્યા સહિતના વિવિધ પાસાંની તપાસ કરી રહી છે. 

પરિવાર પ્રત્યે સંવેદના વ્યક્ત કરી 
ટ્રસ્ટે દીપક લોધીના પરિવાર પ્રત્યે સંવેદના વ્યક્ત કરી છે અને કહ્યું છે કે આશ્રમ પરિવારના દુઃખમાં તેમની સાથે છે. ટ્રસ્ટે ફરી એકવાર સ્પષ્ટ કર્યું કે પોલીસ તપાસ પૂર્ણ થયા બાદ જ મોતની વાસ્તવિક પરિસ્થિતિ સામે આવશે, તેથી ત્યાં સુધી પોલીસ દ્વારા પુષ્ટિ ન કરાયેલા કોઈપણ દાવા પર વિશ્વાસ કરવો નહીં.