મુંબઈ: બોમ્બે હાઈ કોર્ટે અભિનેત્રી પ્રીતિ ઝિન્ટાને દર્શાવતી તમામ ડીપફેક, મોર્ફ કરેલા ફોટા, નકલી વીડિયો અને અન્ય અનધિકૃત ઓનલાઈન સામગ્રીને દૂર કરવાનો આદેશ આપ્યો હતો, અને કહ્યું હતું કે આવી સામગ્રીનો દુરુપયોગ વ્યક્તિના મૂળભૂત અધિકારોનું હનન કરે છે.

ઝિન્ટાને રાહત આપતાં જસ્ટિસ માધવ જામદારની સિંગલ બેન્ચે ઓનલાઈન પ્લેટફોર્મ્સને માહિતી ટેકનોલોજી નિયમો હેઠળ તેમની જવાબદારીઓની યાદ અપાવી. કોર્ટે આવી સામગ્રીનો ઉપયોગ કરવામાં મધ્યસ્થીઓની ભૂમિકાનો મુદ્દો પણ ઉઠાવ્યો હતો, કારણ કે તેમના પ્લેટફોર્મનો પણ દુરુપયોગ થઈ રહ્યો છે. બેન્ચે વિવિધ પ્લેટફોર્મ પર અપલોડ કરાયેલા ઝિન્ટાના આવા તમામ અનધિકૃત અને નકલી ફોટા અને વીડિયો તાત્કાલિક દૂર કરવાનો આદેશ આપ્યો હતો.

અદાલતે જણાવ્યું હતું કે ફિલ્મ ઉદ્યોગ સાથે ૨૫ વર્ષથી વધુ સમયથી જોડાયેલા ઝિંટાએ પોતાની કારકિર્દી દરમિયાન એક મૂલ્યવાન જાહેર ઓળખ ઊભી કરી છે. એઆઈ-જનરેટેડ કન્ટેન્ટમાં તેમની તસવીર, દેખાવ અને હાવભાવનો અનધિકૃત ઉપયોગ તેમની પ્રતિષ્ઠાને નુકસાન પહોંચાડી શકે છે અને તેમના અધિકારોનું ઉલ્લંઘન કરી શકે છે. પોતાના દાવામાં, ઝિન્ટાએ ડીપફેક અને મોર્ફ કરેલા વિઝ્યુઅલ્સ દ્વારા તેને દર્શાવતા વીડિયો, છબીઓ અને ચેટબોટ-શૈલીની વાતચીતનો ઉલ્લેખ કર્યો હતો.

અભિનેત્રીના વકીલે લગભગ 275 વેબસાઇટ્સ તરફ ધ્યાન દોર્યું હતું, જેમાં અભિનેત્રીના દેખાવનો ઉપયોગ કરીને એઆઈ-જનરેટેડ, મોર્ફ કરેલ અથવા સુપરઇમ્પોઝ્ડ ફોટાઓ અને વીડિયો હતા. તેમણે દલીલ કરી હતી કે આવી સામગ્રી તેના વ્યક્તિત્વ, પ્રચાર અને નૈતિક અધિકારોનું ઉલ્લંઘન કરે છે.