નવી દિલ્હી: ઉત્તર પ્રદેશના પૂર્વ IAS અધિકારી દિવ્યા મિત્તલે પોતાના પદ પરથી અચાનક રાજીનામાં આપ્યા બાદ હવે તેઓ જીવનના એક નવા પ્રકરણની શરૂઆત કરવા જઈ રહ્યા છે. રાજ્ય સરકાર દ્વારા 14 સપ્ટેમ્બરે તેમનું રાજીનામું સ્વીકારવામાં આવ્યા બાદ, તેઓ આગળ શું કરશે તે જાણવા માટે તેમના લાખો ફોલોઅર્સ આતુરતાથી રાહ જોઈ રહ્યા છે. આ દરમિયાન તેમણે સોશિયલ મીડિયા પર એક રહસ્યમય પોસ્ટ શેર કરીને ભારે ચર્ચા જગાવી છે.
પૂર્વ IAS અધિકારી દિવ્યા મિત્તલે પોતાની સોશિયલ મીડિયા પોસ્ટમાં આગળના કરિયર અંગે અનેક અટકળો મૂકી છે, જેમાં તેમણે લખ્યું છે કે, "આગળ શું કરવાનું? મેં વાંચ્યું: બાળકો નાના છે. હવે ઘર. સારો પેકેજ મળશે, પરત વિદેશ. IAS પર ચોપડી લખી છે. કોચિંગ. ટિકિટ પક્કી થઈ ગઈ હશે. રાજનીતિ." આ તમામ સવાલો વચ્ચે તેમણે આગામી 29 સપ્ટેમ્બરે સવારે 8:30 વાગ્યે પોતાના આગામી પ્લાન અંગે ખુલાસો કરવાની જાહેરાત કરી છે, જેનાથી ચાહકોમાં ઉત્સુકતા વધી ગઈ છે.
આઈઆઈટી (IIT) અને આઈઆઈએમ (IIM) જેવી પ્રતિષ્ઠિત સંસ્થાઓમાંથી સ્નાતક થયા બાદ લંડનની ઉચ્ચ પદની નોકરી છોડીને UPSC પાસ કરનાર દિવ્યા મિત્તલે 13 વર્ષ સુધી ભારતીય પ્રશાસનિક સેવામાં ઉત્કૃષ્ટ સેવાઓ આપી છે. એક કુશળ અને લોકપ્રિય અધિકારી તરીકે જાણીતા હોવાથી, અચાનક આપેલા રાજીનામા પાછળના કારણોને લઈને સોશિયલ મીડિયા પર વિવિધ ચર્ચાઓ ચાલી રહી છે અને લોકો તેમના આગામી પગલાં પર નજર ટાંકીને બેઠા છે.
અધિકૃત રીતે રાજીનામું મંજૂર થતા પહેલા તેઓ જમ્મુના કટરા ખાતે માતા વૈષ્ણોદેવીના દર્શનાર્થે પહોંચ્યા હતા. સાદી વેશભૂષામાં માતાના દર્શન કર્યા બાદ તેમણે સોશિયલ મીડિયા પર એક ભાવનાત્મક વીડિયો શેર કર્યો હતો, જેમાં તેમણે માતા પ્રત્યે કૃતજ્ઞતા વ્યક્ત કરતા લખ્યું હતું કે આગળનો રથ કઠિન છે પરંતુ સદ્બુદ્ધિ અને સાહસ સાથે તેઓ નવી સફર શરૂ કરવા માટે સંપૂર્ણપણે તૈયાર છે.
