જમ્મુ-કાશ્મીરઃ જમ્મુ-કાશ્મીરમાં આતંકવાદ વિરુદ્ધ ચલાવવામાં આવી રહેલા અભિયાનમાં સુરક્ષા દળોને એક મોટી સફળતા મળી છે. ઉત્તરી કાશ્મીરના અલગ-અલગ વિસ્તારોમાં ચલાવવામાં આવેલા સંયુક્ત સર્ચ ઓપરેશન દરમિયાન સુરક્ષા દળોએ આતંકવાદીઓના ગુપ્ત અડ્ડાઓ શોધી કાઢ્યા છે અને તેને સંપૂર્ણપણે તબાહ કરી દીધા છે. આ કાર્યવાહીથી સરહદ પારથી ઓપરેટ થતા આતંકી નેટવર્કનો પર્દાફાશ કરવામાં આવ્યો છે. 

બારામુલ્લાના ક્રીરીમાં ગુપ્ત આશ્રયસ્થાનનો પર્દાફાશ

સુરક્ષા દળોને ઉત્તરી કાશ્મીરના બારામુલ્લા જિલ્લાના ક્રીરી વિસ્તારમાં આતંકીઓ છુપાયા હોવાની ચોક્કસ ગુપ્ત માહિતી મળી હતી. આ ઇનપુટ્સના આધારે ભારતીય સેના અને સ્થાનિક પોલીસે નીલસર વિસ્તારમાં એક સંયુક્ત સર્ચ ઓપરેશન શરૂ કર્યું હતું. આ ઓપરેશન દરમિયાન સુરક્ષા દળોએ વિસ્તારમાં બનેલા એક અત્યંત ગુપ્ત આતંકી અડ્ડાનો પર્દાફાશ કર્યો હતો. જ્યારે આ સ્થળની બારીકાઈથી તપાસ કરવામાં આવી ત્યારે ત્યાંથી ભારે માત્રામાં વિસ્ફોટક અને અન્ય વાંધાજનક સામગ્રી મળી આવી હતી. 

ઘટનાસ્થળેથી 23 જેટલી વિસ્ફોટક સ્ટિક્સ જપ્ત કરાઈ

કાર્યવાહીની વાત કરવામાં આવે તો, ઘટનાસ્થળેથી આશરે 23 જેટલી વિસ્ફોટક સ્ટિક્સ જપ્ત કરવામાં આવી છે. આતંકવાદીઓ ભવિષ્યમાં આ જગ્યાનો ફરીથી ઉપયોગ ન કરી શકે તે માટે સુરક્ષા દળોએ આ આખા અડ્ડાને નષ્ટ કરી નાખ્યાં છે. આ પહેલા પણ ઉત્તરી કાશ્મીરના જ બાંદીપોરા જિલ્લામાંથી પણ આવી જ એક મોટી સફળતાના સમાચાર સામે આવ્યા હતા. સુરક્ષા દળોએ બાંદીપોરાના અરાગમ વિસ્તારમાં આવેલા ખંજપત્રીના ગાઢ જંગલોમાં એક વિશાળ આતંકી અડ્ડાને ધ્વસ્ત કર્યો હતો.

આ કાર્યવાહી ૧૪ અને ૧૫ મે દરમિયાન એક ખાસ 'સર્ચ એન્ડ ડિસ્ટ્રોય ઓપરેશન' હેઠળ કરવામાં આવી હતી. આ મોટા ઓપરેશનને સેનાની 13 રાષ્ટ્રીય રાઇફલ્સ, બાંદીપોરા પોલીસ અને સીઆરપીએફની ત્રીજી બટાલિયને સંયુક્ત રીતે અંજામ આપ્યો હતો. પહાડી અને દુર્ગમ વિસ્તારમાં સર્ચ ઓપરેશન દરમિયાન સુરક્ષા દળોની નજર ત્યાં આવેલી કુદરતી ગુફાઓ પર પડી હતી. જ્યારે આ ગુફાઓની અંદર જઈને તપાસ કરવામાં આવી ત્યારે ત્યાં છુપાવીને રાખવામાં આવેલો ભારે માત્રામાં યુદ્ધ જેવો સામગ્રી અને દારૂગોળો મળી આવ્યો હતો. આ ગુપ્ત અડ્ડા પરથી આતંકીઓના રોજિંદા કપડાં, ઇલેક્ટ્રોનિક્સ ટૂલ્સ, ખાવા-પીવાનો રાશન તેમજ વાસણો જેવી વસ્તુઓ પણ મળી આવી હતી.