જળસ્તર નીચે ફસાયેલી હવાને કારણ થતું હોવાનું પ્રાથમિક તારણ
અમદાવાદઃ સિરામિક સિટી નામે જાણીતા મોરબી જિલ્લાના વીરપરડા ગામનો કૂવ બે-ચાર દિવસથી ચર્ચાનો મુદ્દો બન્યો હતો. અહીં એક ખૂડતની વાડીમા આવેલા કૂવાનું પાણી કાંઠા સુધી ઉપર આવી ગયું હતું અને દરિયાના મોજાની જેમ હિલોળા મારી રહ્યું હતું. આ કૂવાના વીડિયો સોશિયલ મીડિયા પર ભારે વાયરલ થયા હતા અને લોકોએ અનેક તર્ક-વિતર્ક આપ્યા હતા. જોકે આ મામલે હવે કલેક્ટર સ્વપ્નિલ ખરેએ સ્પષ્ટતા કરી હતી. તેમણે કોઈપણ જાતની ભૂકંપ સંબંધિત શક્યતાઓને નકારી હતી.
મીડિયા સાથે વાત કરતા કલેક્ટરે જણાવ્યું હતું કે જીઓલોજિસ્ટની ટીમ મોરબી જિલ્લાના આ કૂવાની મુલાકાત લીધી હતી. તેમની પ્રાથમિક તપાસના તારણ અનુસાર પાણીનું આ હલનચલન પાણીની નીચે ફસાયેલી હવાને કારણે થઈ રહ્યું હોવાની શક્યતા છે. ફસાયેલી હવામાં જેમ જેમ ફરેફાર થાય છે તેમ તેમ પાણીનું હલનચલન શરૂ થાય છે. આ સાથે બાબતેઅહેવાલ સોંપવા માટે ગુજરાત ગ્રાઉન્ડવોટર રિસર્ચ ઇન્સ્ટિટ્યૂટને પણ જણાવાયું છે.
મોરબીના કૂવામાં પાણી આપમેળે ઉછળતા લોકોમાં આશ્ચર્ય | Mysterious Water Rising in Morbi Well
— Mumbai Samachar Official (@Samachar_Mumbai) August 7, 2026
મોરબી (Morbi) તાલુકાના વીરપરડા (Virparda) ગામે કૂવામાં પાણી આપમેળે ઉછળવાની રહસ્યમય ઘટના સામે આવી છે. બે દિવસ બાદ ફરી બપોરે ૩ વાગ્યે પાણીમાં ઉકાળા આવતા લોકોમાં ભારે કૌતુક સર્જાયું છે.… pic.twitter.com/EWwMZf0X98
કલેક્ટરે એમ પણ જણાવ્યું હતું કે ગાંધીનગર ખાતે ભૂકંપની નોંધ રાખતી ઇન્સ્ટિટ્યુટ ઓફ સિસ્મોલોજીકલ રિસર્ચને પણ પૂછવામાં આવ્યું હતું અને તેમણે પણ છેલ્લા 5-10 દિવસમાં આવી કોઈ અસામાન્ય ભૂકંપ સંબંધિત પ્રવૃત્તિ ધ્યાનમાં આવી ન હોવાનું જણાવ્યું હતું.
અત્રે ઉલ્લેખનીય છે કે આ ખેડૂતે આ કૂવો લગભગ ત્રણેક મહિના પહેલા બનાવ્યો છે. મોરબીમાં પડેલા વરસાદ બાદ આ સ્થિતિ સર્જાઈ હતી. જોકે આસપાસના અન્ય કૂવાઓ શાંત છે અને આવી કોઈ હલનચલન અન્ય કૂવાઓમાં જોવા મળી ન હતી, તેમ પણ સૂત્રોએ જણાવ્યું હતું. દરમિયાન મળતી વિગતો અનુસાર શનિવારે કૂવામાં ખાસ કોઈ ઉછાળા કે હલનચલન જોવા મળ્યું ન હતું.
