આ સપ્તાહે આઠ આઈપીઓ ખુલશે અને આઠ કંપની લિસ્ટ થશે
નિલેશ વાઘેલા
મુંબઇ: શેરબજારમાં આ સપ્તાહે આઠ આઈપીઓ ખુલશે અને આઠ કંપની સ્ટોક એક્સચેન્જ પર લિસ્ટ થશે. ઉપરાંત પાછલા સપ્તાહે સબ્સક્રિપ્શન માટે ખુલેલા ચાર આઈપીઓમાં પણ રોકાણ કરવાની તક મળશે. આ સપ્તાહે પ્રાઇમરી માર્કેટમાં આઠ આઈપીઓ આવશે, જેમાં ૨ આઈપીઓ મેઇનબોર્ડ અને ૬ એસએમઇ સેગમેન્ટના છે.
આમ ૧૧ થી ૧૫ માર્ચ વચ્ચે આઠ કંપનીઓ શેરબજારમાં લિસ્ટેડ થશે. સૌ પ્રથમ પોપ્યુલર વ્હીકલ એન્ડ સર્વિસ કંપનીનો આઈપીઓ ૧૨થી ૧૪ માર્ચ સુધી સબ્સક્રિપ્શન માટે ખુલ્લો રહેશે. આઈપીઓ માટે શેર દીઠ પ્રાઇસ ૨૮૦ થી ૨૯૫ રૂપિયા અને લોટ સાઈઝ ૫૦ શેરની છે. આઈપીઓનું કદ ૬૦૧.૫૫ કરોડ રૂપિયા છે. આ કંપની ૧૯ માર્ચ બીએસઇ અને એનએસઇ પર લિસ્ટ થઇ શકે છે.
જ્યારે ક્રિસ્ટલ ઈન્ટિગ્રેટેડ સર્વિસ આઈપીઓ અંતર્ગત ૧૭૫ કરોડ રૂપિયાના નવા શેર ઈશ્યૂ કરવામાં આવશે, સાથે જ ૧૮ લાખ શેરનો ઓફર ફોર સેલ હશે. આઈપીઓ ૧૪ માર્ચ ખુલશે અને ૧૮ માર્ચ બંધ થશે. આઈપીઓ ઇશ્યૂની પ્રાઇસ બેન્ડ રૂ. ૬૮૦થી રૂ. ૭૧૫ નક્કી કરવામાં આવી છે અને લોટ સાઇઝ ૨૦ શેરની છે. આ કંપની ૨૧ માર્ચે શેર બજારમાં લિસ્ટેડ થઇ શકે છે.
પ્રથમ ઇપીસી પ્રોજેક્ટ આઈપીઓના રૂ. ૩૬ કરોડનો આઈપીઓમાં ૧૧ થી ૧૩ માર્ચ સુધી અરજી કરી શકાશે. રોયલ સેન્સ કંપનીનો ૯.૮૬ કરોડનો આઈપીઓ ૧૨ માર્ચ ખુલશે અને ૧૪ માર્ચ સુધી અરજી કરી શકાશે. સિગ્નોરિયા ક્રિએશનના આઈપીઓમાં ૧૨ માર્ચથી ૧૪ માર્ચ દરમિયાન અરજી કરી શકાશે. એવીપી ઇન્ફ્રાકોનનો આઈપીઓ ૧૩ માર્ચ થી ૧૫ માર્ચ સુધી ખલ્લોે રહેશે. એન્ફ્યુઝ સોલ્યુશન્સનો પબ્લિક ઇશ્યૂ ૧૫ માર્ચે સબક્રિપ્શન માટે ખુલશે અને ૧૯ માર્ચ સુધી અરજી કરી શકાશે. કેપી ગ્રીન એન્જીનિયરિંગનો આઈપીઓ ૧૫ થી ૧૯ માર્ચ સુધી ખુલ્લો રહેશે.
આ સપ્તાહે શેર બજારમાં ઘણી કંપનીઓનું લિસ્ટિંગ થવાનું છે. જેમાં ૧૨મી માર્ચે આર કે સ્વામી કંપની બીએસઇ તથા એનએસઇ પર અને વીઆર ઈન્ફ્રાસ્પેસનું એનએસઇ એસએમઇ પર લિસ્ટિંગ થશે, જ્યારે ૧૩ માર્ચના રોજ જેજી કેમિકલ્સ કંપનીનો શેર બીએસઈ અને એનએસઈ પર અને સોના મશીનરીનો આઈપીઓ એનએસઈ એસએમઈ પર ડેબ્યૂ કરશે. ઉપરાંત ૧૪ માર્ચ ગોપાલ સ્નેક્સ, કૌરા ફાઈન ડાયમંડ જ્વેલરી, શ્રી કરણી ફેબકોમ અને પુને ઇ-સ્ટોક બ્રોકિંગનો શેર ૧૫ માર્ચના રોજ બીએસઇ એસએમઇ પર લિસ્ટ થશે.
