ચેટ બોક્ષમાં ટેક્સ્ટ લખશો અને ઇમેજ ક્રિએટ થઈ જશે, WhatsApp લાવી રહ્યું છે ગજબ Ai ફીચર
Meta એ તાજેતરમાં લૈમા-3 નામનું ખૂબ જ શક્તિશાળી આર્ટિફિશિયલ ઈન્ટેલિજન્સ મોડલ લોન્ચ કર્યું છે. આ મોડલની મદદથી મેટા તેની ઘણી એપ્સ જેમ કે વોટ્સએપ અને મેસેન્જરમાં આર્ટિફિશિયલ ઈન્ટેલિજન્સ ફીચર્સ (WhatsApp Ai features) લાવી રહ્યું છે. ટૂંક સમયમાં જ વોટ્સએપ યુઝર્સ એપમાં સીધા જ રિયલ લાઈફ ફોટા બનાવી શકશે. મેટા Aiના ઈમેજીન ફીચરની મદદથી આ શક્ય બનશે.
હાલમાં, ‘ઇમેજિન’ ફીચરની મદદથી, જે અમેરિકામાં ટ્રાયલ તરીકે ચાલી રહ્યું છે, તેમાં માત્ર WhatsApp ચેટમાં ટેક્સ્ટ લખીને એક ચિત્ર બનાવી શકો છો. તમે એક શબ્દ લખતાની સાથે જ આર્ટિફિશિયલ ઈન્ટેલિજન્સ તેની સાથે જોડાયેલ ચિત્ર બનાવવાનું શરૂ કરી દેશે. તમે જેટલા વધુ શબ્દો લખશો, તેટલું સારું ચિત્ર બનશે. ધારો કે તમે “બરફથી ઢંકાયેલા પર્વતો” ટાઈપ કરશો તો સ્ક્રીન પર બરફથી ઢંકાયેલા પર્વતોની ઇમેજ દેખાશે! આ રીતે આ ફીચર તમારા વિચારોને ચિત્રોમાં કન્વર્ટ કરવામાં મદદ કરશે.
બનાવેલી ઇમેજ પહેલા કરતા વધુ સ્પષ્ટ અને સુંદર હશે, તેમનું રિઝોલ્યુશન પણ સારું રહેશે. તેમજ હવે આ ફોટા પર સીધું ટેક્સ્ટ પણ લખી શકાશે. જો તમે ઇચ્છો તો, તમે આ ફેસિલિટીનો ઉપયોગ તમારા માટે જન્મદિવસનું ડેકોરેશન અથવા મેરેજ કાર્ડ બનાવવા માટે અથવા વ્યવસાયિક રીતે આલ્બમ કવર બનાવવા માટે પણ કરી શકો છો. મેટાનું કહેવું છે કે આ નવું આર્ટિફિશિયલ ઈન્ટેલિજન્સ ફીચર દરેક પ્રકારના યુઝરની જરૂરિયાતોને પૂર્ણ કરશે અને હાઇ ક્વોલિટી ફોટોનું નિર્માણ કરશે.
“ઇમેજિન” સુવિધા એ માત્ર ઇમેજ બનાવવાનું ટૂલ નથી, તે તમારી સાથે કામ કરે છે. જેમ તમે કોઈ શબ્દ લખો છો, આ સુવિધા અન્ય શબ્દો સૂચવશે જેથી તમે તમને જોઈતું ચિત્ર બનાવી શકો. આ રીતે, તમે અને આર્ટિફિશિયલ ઈન્ટેલિજન્સ સાથે મળીને તમને જોઈતું ચિત્ર બનાવી શકશો.
