ગાંધીનગર: આજના ડિજિટલ યુગમાં શિક્ષણ પણ આજના સમયને અનુરૂપ હોવું જોઈએ અને આ માટે ગુજરાત સરકારે એક મહત્વનું પગલું ભર્યું છે. ગુજરાત સરકાર દ્વારા આર્ટિફિશિયલ ઇન્ટેલિજન્સ (AI), બ્લોકચેન, સાયબર સિક્યુરિટી અને ઈમરજિંગ ટેકનોલોજી લો એન્ડ પોલિસીમાં 'પોસ્ટ ગ્રેજ્યુએટ ડિપ્લોમા કોર્સ' શરૂ કરવા માટે ગુજરાત ઇન્ફોર્મેટિક્સ લિમિટેડ (GIL),વિજ્ઞાન અને ટેકનોલોજી વિભાગ (DST) અને ગુજરાત નેશનલ લો યુનિવર્સિટી (GNLU) વચ્ચે કરાર પર હસ્તાક્ષર કરવામાં આવ્યા હતા.
ગાંધીનગર ખાતે આયોજિત 'ગુજરાત વાઇસ ચાન્સેલર્સ મીટ' દરમિયાન આ એમઓયુ પર હસ્તાક્ષર કરવામાં આવ્યા હતા. આ પ્રસંગે વિજ્ઞાન અને ટેકનોલોજી પ્રધાન અર્જુન મોઢવાડીયા, ઉચ્ચ અને ટેકનિકલ શિક્ષણ પ્રધાન ડૉ. પ્રદ્યુમન વાજા, શિક્ષણ વિભાગના અધિક મુખ્ય સચિવ મુકેશ કુમાર, વિજ્ઞાન અને ટેકનોલોજી વિભાગના સચિવ પી.ભારતી તેમજ વિજ્ઞાન અને ટેકનોલોજી વિભાગ હેઠળના તમામ વિભાગીય વડાઓ ઉપસ્થિત રહ્યા હતા.
આ કાર્યક્રમમાં રાષ્ટ્રીય અને ગુજરાત રાજ્યની અગ્રણી યુનિવર્સિટીઓના ૨૦થી વધુ વાઇસ ચાન્સેલરોએ પણ ભાગ લીધો હતો, જે સરકાર અને શૈક્ષણિક સંસ્થાઓ વચ્ચેના સહયોગને મજબૂત કરવા માટે રાજ્યની પ્રતિબદ્ધતા દર્શાવે છે. આ ભાગીદારી દ્વારા GIL ઉભરતી ટેકનોલોજી અને તેના નિયામક માળખા (regulatory frameworks) માં વિશિષ્ટ શૈક્ષણિક કાર્યક્રમોની રચના અને અમલીકરણમાં GNLU ને સહયોગ આપશે.સૂચિત કાર્યક્રમનો ઉદ્દેશ્ય ટેકનોલોજી અને કાયદામાં આંતર શાખાકીય કુશળતા ધરાવતા વ્યાવસાયિકો તૈયાર કરવાનો છે, જે AI ગવર્નન્સ, બ્લોકચેન રેગ્યુલેશન, સાયબર સુરક્ષા કાયદા, ડેટા પ્રાઇવસી અને ડિજિટલ ગવર્નન્સ માટેના પોલિસી ફ્રેમવર્ક જેવા જટિલ પાસાઓ પર ધ્યાન કેન્દ્રિત કરશે. આ પહેલ ગુજરાતની ઝડપથી વિસ્તરી રહેલી ડિજિટલ ઇકોસિસ્ટમને ટેકો આપવા સક્ષમ કુશળ કાર્યબળ (skilled workforce) ઉભું કરવામાં નોંધપાત્ર યોગદાન આપે તેવી અપેક્ષા છે તેમ, સાયન્સ એન્ડ ટેકનોલોજી વિભાગ દ્વારા જણાવ્યું હતું.
