અમદાવાદઃ સતત બીજા દિવસે, ગુજરાતની અનેક સરકારી કચેરીઓ, પાસપોર્ટ કચેરીઓ, પોસ્ટ ઓફિસો અને એક યુનિવર્સિટીને બોમ્બ ધમકીના ઇમેઇલ મળ્યા, જેના કારણે અનેક શહેરોમાં સુરક્ષા એજન્સીઓ દોડતી થઈ હતી. 

વડોદરાની પારુલ યુનિવર્સિટીને સૌથી પહેલા ધમકી મળી હતી. કેમ્પસમાં વિસ્ફોટકો હોવાની ચેતવણી આપતા ઇમેઇલ બાદ, પોલીસ, બોમ્બ ડિસ્પોઝલ સ્ક્વોડ, ડોગ સ્ક્વોડ, લોકલ ક્રાઈમ બ્રાન્ચ અને સ્પેશિયલ ઑપરેશન ગ્રુપની ટીમો ઘટનાસ્થળે દોડી ગઈ હતી. વિદ્યાર્થીઓ અને સ્ટાફને ખાલી કરાવવામાં આવ્યા હતા અને સમગ્ર કેમ્પસની તપાસ કરવામાં આવી હતી.

અધિકારીઓએ જણાવ્યું હતું કે 29 ભારતીય રાજ્યો અને 75થી વધુ દેશોના 65,000 થી વધુ વિદ્યાર્થીઓ યુનિવર્સિટીમાં અભ્યાસ કરે છે, જેના કારણે ખાલી કરાવવા દરમિયાન વડોદરા-વાઘોડિયા રોડ પર ભારે ભીડ જોવા મળી હતી.

સુરતમાં, પીપલોદ વિસ્તારમાં મુખ્ય પાસપોર્ટ ઓફિસને પણ વહેલી સવારે ધમકીભર્યો ઈમેલ મળ્યો હતો. અધિકારીઓએ તાત્કાલિક ઈમારત ખાલી કરાવી અને સંપૂર્ણ તપાસ શરૂ કરી હતી. ઉમરા પોલીસ સ્ટેશન, બોમ્બ ડિસ્પોઝલ સ્ક્વોડ અને ડોગ સ્ક્વોડની ટીમોએ તપાસ હાથ ધરી હતી. ઈમેલ્સ ગુજરાતી અને અંગ્રેજી એમ બન્ને ભાષામાં મળ્યા હતા. સાયબર ટીમ ઈમેલ મોકલનારની શોધમાં લાગી હોવાનું સૂત્રોએ જણાવ્યું હતું.  

ભાવનગરમાં, મુખ્ય પોસ્ટ ઓફિસની અંદર સ્થિત પાસપોર્ટ વિભાગને પણ આવી જ ધમકી મળી હતી, જ્યારે જૂનાગઢમાં, ગાંધીગ્રામ વિસ્તારમાં આવેલી પોસ્ટ ઓફિસને ફરીથી ધમકીભર્યા ઇમેઇલ મળ્યા હતા. આથી સુરક્ષા એજન્સીઓએ તપાસ શરૂ કરી હતી. 

રાજકોટમાં, પાસપોર્ટ ઓફિસ અને પોસ્ટ ઓફિસ બંનેને બપોરે 12:15 વાગ્યાની આસપાસ વિસ્ફોટ થવાની ચેતવણી મળી હતી. ઓફિસો ખાલી કરાવવામાં આવી હતી અને ક્રાઈમ બ્રાન્ચ, એસઓજી એ-ડિવિઝન પોલીસ અને બોમ્બ ડિટેક્શન સ્ક્વોડની ટીમોએ શોધખોળ હાથ ધરી હતી. 

પોલીસે એમ પણ જણાવ્યું હતું કે અમદાવાદની પાસપોર્ટ ઓફિસને ધમકીભર્યો ઈમેલ મળ્યો હતો, ત્યારબાદ સુરક્ષા ટીમોને સ્થળ પર મોકલવામાં આવી હતી અને તપાસ કામગીરી શરૂ કરવામાં આવી હતી.

અધિકારીઓએ જણાવ્યું હતું કે ઇમેઇલ્સ બનાવટી ધમકીઓ હોય તેમ જણાય રહ્યું છે, પરંતુ સુરક્ષા એજન્સીઓએ સાવચેતીરૂપે તમામ સ્થળોએ સંપૂર્ણ તપાસ હાથ ધરી છે. સાયબર ક્રાઇમ ટીમોએ ઇમેઇલ્સના સોર્સની તપાસ શરૂ કરી દીધી હોવાનું પણ તેમણે જણાવ્યું હતું.