મુંબઈ/બીડઃ પુણેવાસીઓ માટે મહત્ત્વના સમાચાર છે કે આગામી મંગળવારથી પુણે અને બીડ વચ્ચે રેગ્યુલર ટ્રેનસેવા શરુ થશે. મધ્ય રેલવેએ જણાવ્યું હતું કે મધ્ય મહારાષ્ટ્રમાં બહુપ્રતિક્ષિત પુણે અને બીડને જોડતી દૈનિક ટ્રેન સેવા 22 સપ્ટેમ્બરથી શરૂ થશે. આ ટ્રેન નવા વિકસાવવામાં આવેલા અહમદનગર-બીડ રૂટ પરથી પસાર થશે.

સત્તાવાર નિવેદન અનુસાર, પુણે-બીડ-પુણે ડેઈલી એક્સપ્રેસ 326 કિલોમીટરનું અંતર 7 કલાક અને 15 મિનિટમાં કાપશે. ટ્રેન નંબર 11433 પુણેથી રાત્રે 10:45 વાગ્યે ઉપડશે અને બીજા દિવસે સવારે 6:00 વાગ્યે બીડ પહોંચશે. પરત મુસાફરીમાં, ટ્રેન નંબર 11434 બીડથી 23 સપ્ટેમ્બરથી રાત્રે 9:30 વાગ્યે ઉપડશે અને બીજા દિવસે સવારે 5:20 વાગ્યે પુણે પહોંચશે. આ ટ્રેનનું બુકિંગ 20 સપ્ટેમ્બરથી શરૂ થશે.

આ ટ્રેન 15 આધુનિક 'લિંકે હોફમેન બુશ' (એલએચબી) કોચ સાથે દોડશે, જેમાં એક એસી 2-ટાયર, બે એસી 3-ટાયર, 6 સ્લીપર ક્લાસ, 4 અનરિઝર્વ્ડ જનરલ સેકન્ડ ક્લાસ, 1 જનરેટર કાર અને 1 લગેજ-કમ-ગાર્ડ વાનનો સમાવેશ થશે.

તે ઉરુલી, દૌંડ ચોર્ડ લાઇન, શ્રીગોંડા રોડ, અહિલ્યાનગર, નારાયણદોહો, ન્યુ અષ્ટી અને અમલનેર ભંડ્યાચે ખાતે થોભશે. એક અખબારી યાદી મુજબ નવી સેવાને કારણે, સેન્ટ્રલ રેલવેએ ત્રણ ટ્રેનોના ઉપડવાના સમયમાં ફેરફાર કર્યો છે.

. 25 સપ્ટેમ્બરથી, 11405 પુણે-અમરાવતી એક્સપ્રેસ પુણેથી 10 મિનિટ મોડી, એટલે કે રાત્રે 10:55 વાગ્યે ઉપડશે.
. 22 સપ્ટેમ્બરથી, 11417 પુણે-સોલાપુર એક્સપ્રેસ પુણેથી રાત્રે 11:00 વાગ્યાને બદલે 11:05 વાગ્યે રવાના થશે.
. 22 સપ્ટેમ્બરથી 16381 પુણે-કન્યાકુમારી એક્સપ્રેસ પુણેથી રાત્રે 11:45 વાગ્યાને બદલે 11:20 વાગ્યે રવાના થશે.