મહારાષ્ટ્રમાં મહિલા મુખ્ય પ્રધાન હોઈ શકે છે, ‘આ’ કોંગ્રેસી નેતાની આગાહી!
મુંબઈ: મહારાષ્ટ્રના રાજકારણમાં છેલ્લા ઘણા દિવસોથી મુખ્ય પ્રધાન તરીકે મહિલાની નિમણૂકને લઈને ચર્ચા ચાલી રહી છે. એનસીપીના કાર્યકરો ભાવિ મુખ્ય પ્રધાન તરીકે તેના નેતા શરદ પવારની પુત્રી સાંસદ સુપ્રિયા સુળે મુખ્ય પ્રધાન બનશે એવી આશા રાખી રહ્યા છે, જ્યારે ભાજપના એક જૂથમાં પંકજા મુંડેના નામની ચર્ચા થઈ રહી છે.
આવી સ્થિતિમાં નાગપુરના એક વરિષ્ઠ કોંગ્રેસી નેતાએ આગાહી કરી છે કે મહારાષ્ટ્રમાં ચોક્કસપણે એક મહિલા મુખ્ય પ્રધાન હોઈ શકે છે. મહારાષ્ટ્રના મુખ્યપ્રધાન તરીકે મહિલા નેતાની પસંદગી થઈ શકે છે કે કેમ તે પ્રશ્નનો જવાબ આપતા વિધાનસભામાં વિરોધ પક્ષના નેતા વિજય વડેટ્ટીવારે આ ભવિષ્યવાણી કરી હતી. કોંગ્રેસે દેશને પ્રથમ મહિલા વડા પ્રધાન, પ્રથમ મહિલા રાષ્ટ્રપતિ આપ્યા.
અન્ય પક્ષો હવે કોંગ્રેસની આ નીતિને અનુસરી રહ્યા છે. મહારાષ્ટ્રમાં મહિલા મુખ્ય પ્રધાન બનવું બહુ મુશ્કેલ બાબત નથી. વડેટ્ટીવારે સમજાવ્યું કે આવી પસંદગી પણ શક્ય છે. મહિલા મુખ્ય પ્રધાનની નિમણૂકને લઈને કોંગ્રેસ પક્ષની સ્થિતિ સકારાત્મક છે. અલબત્ત, પક્ષના નેતાઓ જે નિર્ણય લેશે તે આખરી રહેશે.
રાષ્ટ્રપતિ શાસન…
વડા પ્રધાન નરેન્દ્ર મોદી અને ભાજપ હાલમાં ‘ઈન્ડિયા’ ગઠબંધનના કારણે ગભરાટની સ્થિતિમાં છે. તેથી એક દેશ, એક ચૂંટણી જેવા કારણ આગળ ધરીને ચૂંટણી મુલતવી રાખવા અથવા રાષ્ટ્રપતિ શાસન લાદવાનું ભાજપનું કાવતરું છે, એવો આક્ષેપ કરતા વડેટ્ટીવારે કહ્યું હતું કે રાષ્ટ્રવ્યાપી સર્વેમાં સામે આવ્યું છે કે રાહુલ ગાંધીનું સમર્થન વધી રહ્યું છે.
તેમણે કહ્યું કે ભાજપ ઓછામાં ઓછા બે વર્ષ સુધી ચૂંટણી રોકવાનો પ્રયાસ કરી રહી છે. જો કે, સરકારના આ પ્રયાસોને નિષ્ફળ બનાવવામાં આવશે, એમ તેમણે જણાવ્યું હતું. આ પહેલા કોંગ્રેસના પ્રદેશ અધ્યક્ષ વિધાનસભ્ય નાના પટોલેએ પણ દાવો કર્યો હતો કે રાહુલ ગાંધીનું સમર્થન વધી રહ્યું છે અને દેશમાં કોંગ્રેસની લહેર છે.
