નવી દિલ્હી: દિલ્હીના ચાણક્યપુરી પોલીસ સ્ટેશનમાં તાજ પેલેસ હોટલમાંથી 5,53,000 રૂપિયાની છેતરપિંડીનો ઘટના બની હતી. આ ઘટનામાં ભૂતપૂર્વ અંડર-19 ક્રિકેટર અને હરિયાણાના રહેવાસી મૃણાક સિંહની દિલ્હીના ચાણક્યપુરી પોલીસ સ્ટેશન દ્વારા છેતરપિંડીના આરોપમાં ધરપકડ કરવામાં આવી છે. મૃણાક સિંહ સામેના દિલ્હીની તાજ પેલેસ હોટલમાંથી 5.53 લાખ રૂપિયાથી વધુની છેતરપિંડીનો આરોપ છે. તેણે જુલાઈ 2022માં તાજ પેલેસ હોટલમાંથી 5,53,000 રૂપિયાની છેતરપિંડી કરી હતી. ત્યારબાદ તેણે દાવો કર્યો હતો કે તે આઈપીએલની મુંબઈ ઈન્ડિયન્સ ટીમનું પ્રતિનિધિત્વ કરી રહ્યો છે.
તપાસ દરમિયાન એવી માહિતી પણ જાણવા મળી છે કે આરોપી મૃણાક સિંહે પોતાને કર્ણાટકના વરિષ્ઠ આઇપીએસ અધિકારી તરીકે દર્શાવીને ભારતભરની ઘણી લક્ઝરી હોટલોના માલિકો અને સંચાલકો સાથે છેતરપિંડી કરી હતી. તેમની છેતરપિંડીનો ભોગ બનેલા લોકોમાં ટીમ ઈન્ડિયાનો આંતરરાષ્ટ્રીય ક્રિકેટર ઋષભ પંત પણ સામેલ છે, જેણે 2020-2021માં 1.63 કરોડ રૂપિયાની છેતરપિંડી કરી હતી.
તેણે હોટલ, બાર, રેસ્ટોરન્ટ, યુવતીઓ, કેબ ડ્રાઈવર, નાની ખાણીપીણીની દુકાનો સહિત અનેક લોકો સાથે છેતરપિંડી કરી છે. પોલીસે તેને કોર્ટમાં રજૂ કર્યા બાદ બે દિવસની કસ્ટડીમાં રાખ્યો હતો. હાલમાં આ કેસની તપાસ કરવામાં આવી રહી છે અને તેના મોબાઈલ ફોન પણ ચેક કરવામાં આવી રહ્યો છે. આ કેસમાં હજુ પણ ઘણા બીજા પીડિતો વિશે જાણવા મળે તેવી શક્યતા છે.
નોંધનીય છે કે 22 ઓગસ્ટ 2022ના રોજ તાજ પેલેસ હોટેલ નવી દિલ્હીના સિક્યોરિટી ડાયરેક્ટરે ચાણક્યપુરી પોલીસ સ્ટેશનમાં આરોપી વિરુદ્ધ ફરિયાદ નોંધાવી હતી. તેણે પોતાની ફરિયાદમાં જણાવ્યપં હતું કે ક્રિકેટર હોવાનો દાવો કરનાર મૃણાક સિંહ 22 જુલાઈથી 29 જુલાઈ 2022 સુધી હોટેલ તાજ પેલેસમાં રોકાયો હતો. તે હોટલનું 5,53,362 રૂપિયાનું બિલ ચૂકવ્યા વિના જ હોટલમાંથી નીકળી ગયો હતો. જ્યારે તેને પેમેન્ટ માટે પૂછવામાં આવ્યું ત્યારે તેણે કહ્યું કે તેની કંપની એડિડાસ પેમેન્ટ કરશે. આ પછી હોટલની બેંક વિગતો તેમની સાથે શેર કરવામાં આવી હતી. તેણે રૂ. 2 લાખના ઓનલાઈન ટ્રાન્ઝેક્શનનો UTR નંબર SBIN119226420797 શેર કર્યો. જ્યારે હોટલે પોતાની સિસ્ટમમાં ચેક કર્યું તો જાણવા મળ્યું કે આરોપીએ કોઈ પેમેન્ટ કર્યું નથી.
પોલીસે જણાવ્યું હતું કે આરોપીનો મોબાઈલ ફોન સતત સ્વીચ ઓફ આવતો હતો. તે મોટાભાગે સોશિયલ મીડિયા અને ઈન્ટરનેટ દ્વારા જ પોતાનો વ્યવહાર કરતો હતો. જ્યારે તેના ઓળખીતાઓનું કહેવું છે કે તે હંમેશા એમજ કહેતો કે તે વિદેશમાં જ રહે છે.
જો કે તેની અટકાયત IGI એરપોર્ટ પરથી કરવામાં આવી હતી. તે સમયે પણ તે કર્ણાટકનો આઇપીએસ ઓફિસર હોવાનો ઢોંગ કરીને તેમને દબાવવાનો પ્રયાસ કરતો હતો. જો કે આ વખતે તેનું ષડયંત્ર કામમાં ન આવ્યું અને 25 ડિસેમ્બર 2023 ના રોજ આ કેસમાં તેની ધરપકડ કરવામાં આવી હતી. પૂછપરછ દરમિયાન તેણે વારંવાર પોલીસને ગેરમાર્ગે દોરવાનો પ્રયાસ કર્યો હતો. તેણે દાવો કર્યો કે તેના પિતા અશોક કુમાર સિંહ પણ આંતરરાષ્ટ્રીય ક્રિકેટ ખેલાડી છે અને 1980 થી 90 ના દાયકા સુધી ભારતીય ક્રિકેટ ટીમ માટે ઓલરાઉન્ડર તરીકે રમ્યા છે અને હાલમાં એર ઈન્ડિયામાં મેનેજર છે. તેના મોબાઈલ ફોનની પ્રાથમિક તપાસમાં તેણે ઘણા લોકો સાથે છેતરપિંડી કરી હોવાનું અને ઠગાઈની રકમ લાખોમાં હોવાનું બહાર આવ્યું છે.