સુરતનો હરમીત દેસાઈ પહેલી જ ઑલિમ્પિક્સના બીજા રાઉન્ડમાં પહોંચી ગયો

પૅરિસ: ટેબલ ટેનિસનો ભારતનો ટોચનો ખેલાડી હરમીત દેસાઈ શનિવારે પૅરિસ ઑલિમ્પિક્સના પ્રથમ રાઉન્ડમાં જોર્ડનના ઝૈદ અબો યમનને 11-7, 11-9, 11-5, 11-5થી હરાવીને બીજા રાઉન્ડમાં પહોંચી ગયો હતો.
હરમીતની આ પહેલી જ ઑલિમ્પિક્સ છે અને વિશ્ર્વમાં 538મી રૅન્ક ધરાવતા ઝૈદ સામે જીતવામાં તેને ખાસ કોઈ મુશ્કેલી નહોતી પડી. આ મૅચ બરાબર 30 મિનિટ ચાલી હતી. 31 વર્ષના હરમીતે 2018 અને 2022ની કૉમનવેલ્થ ગેમ્સમાં ભારતને ગોલ્ડ મેડલ અપાવ્યો હતો.

આ પણ વાંચો: Paris Olympics 2024ના ઐતિહાસિક, અકલ્પનીય સમારોહે આખી દુનિયાને મંત્રમુગ્ધ કરી

હરમીત ઘણા વર્ષોથી ઑલિમ્પિક્સમાં સ્થાન પામવા મહેનત કરી રહ્યો હતો અને આ વખતે તેની મહેનત રંગ લાવી રહી છે. તે ઑલિમ્પિક્સને બાદ કરતા બીજી બધી મોટી ઇન્ટરનૅશનલ સ્પર્ધાઓમાં રમી ચૂક્યો છે.

ભારતનો પીઢ ટી.ટી. ખેલાડી શરથ કમલ પણ આ સ્પર્ધામાં ભાગ લઈ રહ્યો છે. શુક્રવારે ઑલિમ્પિક્સની ઓપનિંગ સેરેમનીમાં ભારતીય સંઘની તિરંગા સાથે આગેવાની સંભાળવામાં પી. વી. સિંધુ સાથે શરથ કમલ પણ હતો.