નવી દિલ્હી: આધાર કાર્ડ સંબંધિત છેતરપિંડી અને દુરુપયોગના વધતા બનાવોને ધ્યાનમાં રાખીને, યુનિક આઇડેન્ટિફિકેશન ઓથોરિટી ઓફ ઇન્ડિયા (UIDAI) એ આધાર કાર્ડ ધારકોની સુરક્ષા વધારવા માટે એક નવી સુવિધા રજૂ કરી છે. આધાર કાર્ડ ધારકો હવે તેમના બાયોમેટ્રિક્સને લોક અને અનલોક કરવાની પ્રક્રિયા નવી મોબાઇલ એપ દ્વારા સરળતાથી કરી શકશે.
UIDAI દ્વારા નવી ‘આધાર એપ’ લોન્ચ
UIDAI એ એક પોસ્ટ દ્વારા નવી આધાર એપ લોન્ચ કરવાની જાહેરાત કરી છે. આ એપ હવે Android માટે પ્લે સ્ટોર અને iOS માટે એપ સ્ટોર પર ઉપલબ્ધ છે. નવી એપની મુખ્ય વિશેષતાઓમાંની એક બાયોમેટ્રિક્સને લોક/અનલોક કરવાની સરળતા છે. વપરાશકર્તાઓ એપ પર નીચે સ્ક્રોલ કરીને ‘લોક/અનલોક’ વિકલ્પ પસંદ કરી શકે છે.
UIDAI એ જણાવ્યું છે કે નવી આધાર એપમાં ઉન્નત સુરક્ષા, સરળ ઍક્સેસ અને સંપૂર્ણપણે પેપરલેસ અનુભવ જેવી નવી સુવિધાઓનો સમાવેશ કરવામાં આવ્યો છે. એપમાં હવે આધાર કાર્ડ મોબાઇલ એપ પર જ પ્રદર્શિત કરી શકાય છે. સાથોસાથ જન્મ તારીખ છુપાવવાની સુવિધા સાથે સુરક્ષામાં વધારો કરવામાં આવ્યો છે.
ઉલ્લેખનીય છે કે, આધાર કાર્ડમાં UIDAI દ્વારા જનરેટ કરાયેલ એક અનોખો 12-અંકનો નંબર હોય છે, જે દરેક ભારતીયને અનન્ય રીતે ઓળખે છે. આ નવી સુવિધા દ્વારા આધાર કાર્ડ ધારકો તેમના ડેટાની સુરક્ષા પર વધુ નિયંત્રણ મેળવી શકશે.
