રેલવેમાં નોકરી કરવા ઈચ્છતા લોકો માટે મોટી તક: 3,058 ખાલી જગ્યાઓ માટે આવી બંપર ભરતી
અમદાવાદ: રેલ્વે ભરતી બોર્ડ (RRB) દ્વારા નોન-ટેકનિકલ પોપ્યુલર કેટેગરીઝ (UG) એટલે કે RRB NTPC UG ભરતી (CEN નં. 07/2025) માટે અરજી પ્રક્રિયા શરૂ કરી દેવામાં આવી છે. આ ભરતી ઝુંબેશ દ્વારા 3,058 ખાલી જગ્યાઓ ભરવામાં આવશે, જેમાં ટ્રાફિક સહાયક, વાણિજ્યિક કમ ટિકિટ ક્લાર્ક, એકાઉન્ટ્સ ક્લાર્ક કમ ટાઇપિસ્ટ, જુનિયર ક્લાર્ક કમ ટાઇપિસ્ટ અને ટ્રેન ક્લાર્ક જેવી પોસ્ટ્સનો સમાવેશ થાય છે. રસ ધરાવતા અને લાયક ઉમેદવારો સત્તાવાર વેબસાઇટની મુલાકાત લઈને અરજી ફોર્મ ભરી શકે છે. આ ભરતી માટે અરજી કરવાની છેલ્લી તારીખ કઈ છે અને અરજી કેવી રીતે કરવી? આવો જાણીએ.
RRBની ભરતી માટે અરજી કરવાની પ્રક્રિયા
RRB NTPC UG ભરતી (CEN નં. 07/2025) માટે ઓનલાઈન અરજી જ સ્વીકારવામાં આવશે. આ ભરતી માટે 28 ઓક્ટોબર 2025ના રોજ ઓનલાઈન અરજી સ્વીકારવાની શરૂઆત થઈ ગઈ છે. ઓનલાઈન અરજી કરવાની છેલ્લી તારીખ 27 નવેમ્બર, 2025(રાત્રે 11:59) છે. આ ભરતીની અરજી ફી ભરવાની છેલ્લી તારીખ 29 નવેમ્બર, 2025 છે. અરજીમાં સુધારા માટે કરેક્શન વિન્ડો 30 નવેમ્બર, 2025થી 9 ડિસેમ્બર, 2025 સુધી ખુલ્લી રાખવામાં આવશે.
આ પણ વાંચો : રેલવેમાં નોકરીની સુવર્ણ તકઃ આસિસ્ટંટ લોકો પાયલટ બનવા માટે 9970 જગ્યા પર થશે ભરતી, કઈ રીતે કરશો અરજી?
અરજી કરવા ઈચ્છતા ઉમેદવારોએ સૌપ્રથમ RRBની સત્તાવાર વેબસાઇટની મુલાકાત લેવી પડશે. વેબસાઈટના હોમપેજ પર આપેલી સંબંધિત લિંક પર ક્લિક કરીને નોંધણી (Registration) પ્રક્રિયા પૂર્ણ કરવી. નોંધણી કર્યા બાદ લોગ-ઇન કરીને અરજી ફોર્મમાં તમામ જરૂરી વિગતો ભરીને ફોર્મ સબમિટ કરવાનું રહેશે. ફોર્મ સબમિટ કર્યા બાદ પુષ્ટિકરણ પૃષ્ઠ (Confirmation Page) ડાઉનલોડ કરીને તેની પ્રિન્ટઆઉટ લેવાની રહેશે.
અરજી કરનાર ઉમેદવારોને RRBની સલાહ
RRB એ ઉમેદવારોને ભારપૂર્વક સલાહ આપી છે કે તેઓ ઓનલાઈન અરજી ભરતી વખતે આધાર કાર્ડનો ઉપયોગ કરીને તેમની પ્રાથમિક વિગતોની ચકાસણી કરે. બોર્ડે જણાવ્યું છે કે, આમ કરવાથી ભરતી પ્રક્રિયાના દરેક તબક્કે બિન-આધાર ચકાસાયેલ અરજીઓની વિગતવાર ચકાસણીને કારણે થતી અસુવિધા અને વધારાના વિલંબને ટાળી શકાય છે. વધુ વિગતો અને સત્તાવાર સૂચના માટે, ઉમેદવારોએ તેમની પસંદગીના પ્રાદેશિક RRBની સત્તાવાર વેબસાઇટની મુલાકાત લેવાની રહેશે.
આ પણ વાંચો : રેલવેમાં નોકરીને નામે યુવાનો સાથે 56 લાખની છેતરપિંડી: ત્રણ સામે ગુનો
