લાહોર: પાકિસ્તાનના પંજાબમાં છેલ્લા ૨૪ કલાકમાં મુશળધાર વરસાદને કારણે ૩૦ લોકોના મોત થયા છે, જેના કારણે પ્રાંતીય સરકારે વિવિધ ભાગોમાં “વરસાદની ઈમરજન્સી” જાહેર કરી છે, એમ અધિકારીઓએ જણાવ્યું હતું.
સૌથી વધુ અસરગ્રસ્ત વિસ્તાર ચકવાલ હતો, જે લાહોરથી લગભગ ૩૦૦ કિલોમીટર દૂર પ્રાંતનો ખારો વિસ્તાર છે, જ્યાં છેલ્લા ૨૪ કલાકમાં ૪૨૩ મીમી વરસાદ પડ્યો હતો, જેના કારણે આ વિસ્તારમાં પૂર આવ્યું હતું, એમ અધિકારીઓએ જણાવ્યું હતું.
રિજનલ ડિઝાસ્ટર મેનેજમેન્ટ ઓથોરિટી (પીડીએમએ) એ અહીં એક નિવેદનમાં જણાવ્યું હતું કે, “સૈન્ય અને સ્થાનિક વહીવટીતંત્રના સહયોગથી અચાનક પૂરમાં ફસાયેલા લોકોને બહાર કાઢવા માટે ચકવાલમાં બચાવ કામગીરી ચાલી રહી છે. આજે પણ સમગ્ર પ્રાંતમાં ચોમાસાનો વરસાદ ચાલુ રહેવાની ધારણા છે અને અધિકારીઓએ પંજાબમાં નદીઓ અને નાળાઓમાં સંભવિત પૂર માટે ચેતવણી જારી કરી છે.
છેલ્લા ૨૪ કલાકમાં ૩૦ લોકોના મોત સાથે, સમગ્ર પાકિસ્તાનમાં વરસાદ સંબંધિત ઘટનાઓમાં મૃત્યુઆંક ૧૭૦ પર પહોંચી ગયો છે, પરંતુ મોટાભાગના મૃત્યુ પંજાબમાં થયા છે. પીડીએમએએ જણાવ્યું હતું કે ૩૦ લોકોના મોત ઉપરાંત, છેલ્લા ૨૪ કલાકમાં વરસાદ સંબંધિત ઘટનાઓમાં સમગ્ર પંજાબમાં ૩૦૦ લોકો ઘાયલ થયા છે, જેમાં મોટાભાગના મૃત્યુ લાહોર, ફૈસલાબાદ, ઓકારા, સાહિવાલ, પાકપટ્ટન અને ચકવાલમાં થયા છે. આ વિસ્તારોમાં ૧૨૫થી વધુ ઘરોને નુકસાન થયું છે, એમ તેમણે ઉમેર્યું હતું.
