બિહારમાં જૈશ-એ-મોહમ્મદના ત્રણ આતંકીઓની ઘૂસણખોરીની ચોંકાવનારી માહિતી સામે આવી છે. આ ખતરાને ધ્યાનમાં રાખીને ગુરુવાર, 28 ઓગસ્ટના રોજ બિહાર પોલીસે હાઈ એલર્ટ જાહેર કર્યું છે. આ માહિતી મળતાં જ પોલીસ મુખ્યાલય અને વરિષ્ઠ અધિકારીઓ એક્શન મોડમાં આવી ગયા છે. રાજ્યમાં આગામી વિધાનસભા ચૂંટણીઓને ધ્યાનમાં રાખીને સુરક્ષા વ્યવસ્થાને વધુ કડક કરવામાં આવી છે. ઉલ્લેખનીય છે કે આ ઘટના એવા સમયે બહાર આવી જ્યારે કોંગ્રેસના નેતા રાહુલ ગાંધી બિહારમાં SIR વિરુદ્ધ મતદાર અધિકાર યાત્રા કરી રહ્યા છે.
સૂત્રો પાસેથી મળેલી માહિતી અનુસાર, જૈશ-એ-મોહમ્મદ સાથે સંકળાયેલા આ ત્રણ આતંકીઓ નેપાળના રસ્તે બિહારમાં પ્રવેશ્ય છે. આ ત્રણેય પાકિસ્તાનના નાગરિકો છે, જેમાં હસનૈન અલી (રાવલપિંડી), આદિલ હુસૈન (ઉમરકોટ) અને મોહમ્મદ ઉસ્માન (બહાવલપુર)નો સમાવેશ થાય છે. બિહાર પોલીસે આ આતંકીઓની તસવીરો જાહેર કરી છે અને તેમના પાસપોર્ટની વિગતો સરહદી જિલ્લાઓના અધિકારીઓ સાથે શેર કરી છે. આ ઘટનાએ સુરક્ષા એજન્સીઓમાં ખળભળાટ મચાવ્યો છે.
આશ્ચર્યજનક રીતે, આ ત્રણેય આતંકીઓ ઓગસ્ટના બીજા સપ્તાહમાં જ નેપાળની રાજધાની કાઠમંડુ પહોંચી ગયા હતા. ત્યાંથી તેઓ ગત સપ્તાહે બિહારમાં ઘૂસ્યા હોવાનું જાણવા મળ્યું છે. હવે જઈને આ માહિતી સુરક્ષા એજન્સીઓને મળી છે, જેના કારણે રાજ્યમાં હાઈ એલર્ટ જાહેર કરવામાં આવ્યું છે. આ આતંકીઓ દેશના કોઈપણ ભાગમાં આતંકી હુમલો કરી શકે છે, એવી આશંકા વ્યક્ત કરવામાં આવી છે.
બિહાર પોલીસે તમામ જિલ્લાઓના ગુપ્તચર તંત્રને સક્રિય કરીને સંદિગ્ધ આતંકીઓની શોધખોળ અને તેમની સામે કડક કાર્યવાહીનો આદેશ આપ્યો છે. પોલીસ મુખ્યાલયે સરહદી વિસ્તારોમાં ખાસ નજર રાખવા અને સૂચનાઓનું સંકલન કરવા સૂચના આપી છે. આ ઘટના એવા સમયે બની છે જ્યારે બિહારમાં એસઆઈઆરનો મુદ્દો ચર્ચામાં છે અને રાહુલ ગાંધી, પ્રિયંકા ગાંધી જેવા વિપક્ષના નેતાઓના રાજ્યના પ્રવાસ ચાલી રહ્યા છે.
આગામી વિધાનસભા ચૂંટણીઓને ધ્યાનમાં રાખીને બિહાર પોલીસ આતંકી ગતિવિધિઓ પર સતત નજર રાખી રહી છે. આ હાઈ એલર્ટના કારણે સરહદી જિલ્લાઓમાં સુરક્ષા વધારવામાં આવી છે, અને સંદિગ્ધ ગતિવિધિઓ પર ઝીણવટભરી નજર રાખવામાં આવી રહી છે. આ ઘટનાએ રાજ્યમાં સુરક્ષાની સ્થિતિને વધુ ગંભીર બનાવી છે, અને પોલીસ તમામ સંભવિત ખતરાઓને રોકવા માટે સજ્જ છે.
આપણ વાંચો: સીબીએસઈ 2026ની બોર્ડ પરીક્ષા માટે નવી સિસ્ટમ, માર્કસીટ થયેલી ભૂલો સુધારી શકાશે…
