‘આત્મનિર્ભર ભારત’ હેઠળ રક્ષા મંત્રાલયે તેજસ Mk1A માટે મંજૂરી આપી; 2027માં શરૂ થશે ડિલિવરી
નવી દિલ્હી: ભારતીય વાયુસેનાને મજબૂત કરવા અને ‘આત્મનિર્ભર ભારત’ની પહેલને વેગ આપવા માટે એક મોટું પગલું લેવામાં આવ્યું છે. રક્ષા મંત્રાલયે હિન્દુસ્તાન એરોનોટિક્સ લિમિટેડ (HAL) સાથે રૂ. 62,370 કરોડના 97 લાઇટ કોમ્બેટ એરક્રાફ્ટ (LCA) તેજસ Mk1Aનો ઐતિહાસિક સોદો કર્યો છે. આ સોદાથી ભારતીય વાયુસેનાને શું લાભ થશે? આવો જાણીએ.
2027-28માં શરૂ થશે ડિલિવરી
તેજસ Mk1Aનો ઐતિહાસિક સોદો ‘બાય (ભારત-IDDM)’ શ્રેણી હેઠળ કરવામાં આવ્યો છે. આ શ્રેણી સંપૂર્ણપણે સ્વદેશી ઉત્પાદનો માટે છે. સોદામાં ખરીદવામાં આવેલા 97 વિમાનો પૈકી 68 સિંગલ-સીટ ફાઇટર અને 29 ડબલ-સીટ ટ્રેનર છે. વિમાનોની ડિલિવરી 2027-28માં શરૂ થશે અને આગામી છ વર્ષમાં પૂર્ણ થશે.
આ પણ વાંચો : એક બે દિવસમાં પ્રથમ ઉડાન ભરશે IAFનું ફાઇટર જેટ Tejas MK1A, જાણો કેટલું છે પાવરફૂલ?
તેજસ કાર્યક્રમ 1980ના દાયકામાં જૂના MiG-21 વિમાનોને બદલવા માટે શરૂ થયો હતો. 2003માં તેને “તેજસ” નામ આપવામાં આવ્યું, જેનો સંસ્કૃતમાં અર્થ “તેજસ્વી” થાય છે. ટેક્નોલોજીકલ પડકારો અને ભંડોળના અવરોધો છતાં ભારતીય વૈજ્ઞાનિકોએ એવિઓનિક્સ અને રડાર જેવી મહત્વપૂર્ણ સિસ્ટમ્સ સ્વદેશી રીતે વિકસાવી છે. આજે, તેજસ એક 4.5-જનરેશનનું મલ્ટીરોલ ફાઇટર છે, જે હવાથી હવા, હવાથી જમીન, અને જાસૂસી મિશન માટે સક્ષમ છે.
વાયુસેનામાં તેજસ Mk1Aની સંખ્યા 220 થશે
તેજસ Mk1A આ લાઈનઅપમાં સૌથી અદ્યતન સંસ્કરણ છે. તે એક-એન્જિન, ડેલ્ટા-વિંગ એરક્રાફ્ટ છે, જે તેની ગતિ અને દાવપેચ માટે જાણીતું છે. તેમાં અદ્યતન AESA રડાર, સ્વ-રક્ષણ ઇલેક્ટ્રોનિક યુદ્ધ પ્રણાલી, અને હેલ્મેટ-માઉન્ટેડ ડિસ્પ્લે જેવી આધુનિક સુવિધાઓ છે. આ વિમાન 64% થી વધુ સ્વદેશી સામગ્રીથી બનેલું છે અને ભારતીય પરિસ્થિતિઓને અનુરૂપ 67 નવી સુવિધાઓ ઉમેરવામાં આવી છે. આ સોદાથી ભારતીય એરોસ્પેસ ઇકોસિસ્ટમ મજબૂત થશે અને 105થી વધુ ભારતીય કંપનીઓ તથા MSMEsને ફાયદો થશે.
આ પણ વાંચો : Republic Day હમ હૈ તૈયારઃ પરેડમાં Indian Air Forceના 40 ફાઈટર જેટ ભાગ લેશે
ઉલ્લેખનીય છે કે, આ ઐતિહાસિક સોદા બાદ ભારતીય વાયુસેનામાં તેજસ વિમાનોની કુલ સંખ્યા 220 થશે. ભારતીય વાયુસેના ભવિષ્યમાં આ સંખ્યા 324 સુધી પહોંચાડવાની યોજના બનાવી રહી છે. તેજસ Mk1A પછી Mk2 અને પછી પાંચમી પેઢીનું સ્ટીલ્થ ફાઇટર AMCA (એડવાન્સ્ડ મીડિયમ કોમ્બેટ એરક્રાફ્ટ) વિકસાવવામાં આવી રહ્યું છે. આ પ્રોજેક્ટ્સ ભારતને ભવિષ્યમાં એરોસ્પેસ પાવરહાઉસ બનાવવાનું લક્ષ્ય ધરાવે છે.
