નવી દિલ્હી: હેન્લે પાસપોર્ટ ઇન્ડેક્સના સમાચાર ભારત માટે શુભ સંકેત લઈ આવ્યું છે, જેમાં તેની રેન્કિંગ 85માંથી 77મા સ્થાને પહોંચી ગઈ છે. જાન્યુઆરી 2025થી ભારતને 59 દેશ માટે વિઝા ફ્રી સુવિધા મળી છે. આ સુધારો આંતરરાષ્ટ્રીય સ્તરે ભારતની વધતી પ્રતિષ્ઠા અને દ્વિપક્ષીય કરારોનું પરિણામ છે. આ રેન્કિંગે ભારતીય નાગરિકો માટે આંતરરાષ્ટ્રીય મુસાફરીને વધુ સરળ બનાવવાની આશા જગાવી છે.
હેન્લે પાસપોર્ટ ઇન્ડેક્સની જુલાઈ 2025ની રેન્કિંગ અનુસાર ભારતીય પાસપોર્ટે આઠ પોઈન્ટનો સુધારો કર્યો છે અને હવે તે 77મા ક્રમે રહ્યું છે. આ રેન્કિંગ આંતરરાષ્ટ્રીય વાયુ પરિવહન સંઘ (IATA)ના ડેટા પર આધારિત છે, જે દર્શાવે છે કે ભારતીય પાસપોર્ટધારકો હવે 59 દેશમાં વિઝા વગર મુસાફરી કરી શકે છે. આ સુધારો ભારતની રાજકીય પહેલ અને દ્વિપક્ષીય સમજૂતીઓની સફળતાને દર્શાવે છે, જેનાથી ભારતીય પાસપોર્ટની વૈશ્વિક માન્યતા વધી છે.
આ પણ વાંચો: વિશ્વના સૌથી શક્તિશાળી પાસપોર્ટની યાદી જાહેર; જાણો ભારત કેટલામાં સ્થાને?
હેન્લે પાસપોર્ટ ઇન્ડેક્સમાં સિંગાપોરે પોતાનું શ્રેષ્ઠ સ્થાન જાળવી રાખ્યું છે, આ પાસપોર્ટધારકો 227માંથી 193 દેશોમાં વિઝા-ફ્રી પ્રવેશ મેળવી શકે છે. એશિયાઈ દેશો જાપાન અને દક્ષિણ કોરિયા 190 દેશોની વીઝા-મુક્ત પહોંચ સાથે બીજા સ્થાને છે. યુરોપીયન યુનિયનના સાત દેશો – ડેન્માર્ક, ફિનલેન્ડ, ફ્રાન્સ, જર્મની, આયર્લેન્ડ, ઇટલી અને સ્પેન – 189 દેશની પહોંચ સાથે ત્રીજા સ્થાને છે. ચોથા સ્થાને ઑસ્ટ્રિયા, બેલ્જિયમ, લક્ઝમબર્ગ, નેધરલેન્ડ્સ, નૉર્વે, પોર્ટુગલ અને સ્વીડન છે, જ્યારે ન્યૂ ઝીલેન્ડ, ગ્રીસ અને સ્વિટ્ઝર્લેન્ડ 187 દેશની પહોંચ સાથે પાંચમા સ્થાને છે.
સઉદી અરેબિયાએ પણ પાસપોર્ટ રેન્કિંગમાં નોંધપાત્ર સુધારો કર્યો છે, જે 91 દેશોની વીઝા-મુક્ત પહોંચ સાથે ચાર સ્થાન ઉપર ચઢીને 54મા ક્રમે પહોંચ્યું છે. બીજી તરફ, યુનાઇટેડ કિંગડમ અને યુનાઇટેડ સ્ટેટ્સની રેન્કિંગમાં ઘટાડો થયો છે. યુકે 186 દેશોની પહોંચ સાથે છઠ્ઠા સ્થાને, જ્યારે અમેરિકા 182 દેશોની પહોંચ સાથે 10મા સ્થાને છે. નોંધનીય છે કે અમેરિકાને પહેલીવાર ટોચના 10માંથી બહાર થવાનો ખતરો છે, જે ગયા દાયકામાં તેની રેન્કિંગમાં સતત ઘટાડાને દર્શાવે છે.
આ પણ વાંચો: દુનિયાના શક્તિશાળી પાસપોર્ટમાં Indiaનો રેન્ક Pakistan કરતાં આગળ કે પાછળ?
ઉલ્લેખનીય છે કે, ભારતના પાસપોર્ટ રેન્કિંગમાં આ સુધારો દેશની વધતી આંતરરાષ્ટ્રીય પ્રતિષ્ઠા અને રાજનાયિક પ્રયાસોનું પરિણામ છે. જોકે, વિઝા-મુક્ત દેશોની સંખ્યામાં માત્ર બે સ્થાનનો વધારો થયો છે, આ સુધારો ભારતની દ્વિપક્ષીય સમજૂતીઓ અને વૈશ્વિક સંબંધોમાં પ્રગતિને દર્શાવે છે. આ રેન્કિંગ ભારતીય નાગરિકો માટે આંતરરાષ્ટ્રીય મુસાફરીને વધુ અનુકૂળ બનાવવાની દિશામાં એક મહત્વનું પગલું છે, અને ભવિષ્યમાં આવા સુધારાઓ ચાલુ રહેવાની અપેક્ષા છે.
