ઈન્ડિગો કટોકટી મામલે સરકારની કાર્યવાહી, બીજી એરલાયન્સને મળશે ફ્લાઈટ સ્લોટ
નવી દિલ્હી: ઈન્ડિગો એરલાઈન્સ (IndiGo Airlines)ના સંચાલનમાં સર્જાયેલી ભારે અવ્યવસ્થાના કારણે કેન્દ્ર સરકારે કડક કાર્યવાહીના સંકેતો આપ્યા છે. નાગરિક ઉડ્ડયન મંત્રી કે. રામ મોહન નાયડુએ સોમવારે સ્પષ્ટ કર્યું હતું કે સરકાર ઈન્ડિગોના શિયાળુ ઉડાન ફ્લાઈટ શેડ્યૂલમાં કાપ મૂકવા જઈ રહી છે.
આ પગલું એરલાઈનના સંચાલનમાં સ્થિરતા સુનિશ્ચિત કરવા અને હજારો મુસાફરોને પડી રહેલી હાલાકીને ઓછી કરવાના ઉદ્દેશ્યથી લેવામાં આવી રહ્યું છે. હાલમાં ઈન્ડિગો દૈનિક લગભગ 2200 ફ્લાઇટ્સનું સંચાલન કરી રહી છે, પરંતુ મંત્રીએ કહ્યું કે “અમે તેને ચોક્કસપણે ઘટાડીશું.”
ઈન્ડિગોમાં 1લી ડિસેમ્બરથી 8મી ડિસેમ્બરની વચ્ચે હજારો મુસાફરોને ફ્લાઇટ રદ્દ થવા, લાંબો સમય રાહ જોવી પડવી અને સામાન પહોંચાડવામાં વિલંબ (Baggage Delay) જેવી અનેક સમસ્યાઓનો સામનો કરવો પડ્યો હતો. સરકારે આ સમયગાળા દરમિયાન રદ્દ થયેલા 730655 PNRs માટે મુસાફરોને કુલ 745 કરોડ રૂપિયાનું રિફંડ (Refund) ચૂકવી દીધું હોવાનું જણાવ્યું છે.
વળી, એરલાઈન પાસે ફસાયેલા લગભગ 9000 બેગમાંથી 6000 બેગ મુસાફરોને પહોંચાડવામાં આવી છે, અને બાકીના બેગ મંગળવાર સુધીમાં પહોંચાડવાનો લક્ષ્યાંક છે. કેન્દ્રીય મંત્રી રામ મોહન નાયડુ આવતીકાલે બપોરે 12 વાગ્યે લોકસભામાં ઈન્ડિગોના આ સંકટ પર જવાબ આપશે.
આ અવ્યવસ્થા બાદ ડીજીસીએ (DGCA – Directorate General of Civil Aviation) એ ઈન્ડિગોને કારણદર્શક નોટિસ (Show-Cause Notice) પણ પાઠવી હતી. તેના જવાબમાં ઈન્ડિગોએ આ સંકટ માટે ટેકનિકલ ખામીઓ, શિયાળુ સમયપત્રકમાં ફેરફાર, ખરાબ હવામાન (Bad Weather), એર ટ્રાફિકની ભીડ અને નવી ક્રૂ રોસ્ટરિંગ નીતિને જવાબદાર ગણાવી હતી. જોકે, ડીજીસીએ આ જવાબોથી સંપૂર્ણ સંતુષ્ટ નથી અને એરલાઈન સામે વધુ કડક પગલા લેવા અંગે વિચારણા કરી રહ્યું છે.
આ ગંભીર પરિસ્થિતિના કારણે માત્ર મુસાફરો જ નહીં, પરંતુ એરલાઈનના રોકાણકારોને પણ મોટું નુકસાન થયું છે. ન્યૂઝ એજન્સીના એક અહેવાલ મુજબ, આ સંકટને કારણે છેલ્લા સાત દિવસમાં ઈન્ડિગોના શેર (Shares) માં લગભગ 17% નો જંગી ઘટાડો નોંધાયો છે, જેના પરિણામે તેની બજાર કિંમતમાં (Market Value) 4.3 અબજ ડોલરનો ઘટાડો થયો છે. આમાં સોમવારે શેરની કિંમતમાં થયેલો 8.3% નો ઘટાડો પણ સામેલ છે.
દરમિયાન, નાગરિક ઉડ્ડયન મંત્રાલયે આજે તમામ એરલાઈન ઓપરેટરોની એક ઉચ્ચ-સ્તરીય સમીક્ષા બેઠક બોલાવી છે, જેમાં ઈન્ડિગોની સ્થિતિ, રિફંડ પ્રક્રિયા, એરફેર કેપિંગ અને ભવિષ્યમાં આવી અવ્યવસ્થા ટાળવા માટેના ઉપાયો પર ચર્ચા કરવામાં આવશે.
આ પણ વાંચો…સતત સાતમા દિવસે ઈન્ડિગો સંકટ યથાવત્, 450થી વધુ ફ્લાઈટ કેન્સલ
