નવી દિલ્હી: ભારતનું ચૂંટણી પંચ દેશના 12 રાજ્યો અને કેન્દ્રશાસિત પ્રદેશોમાં સ્પેશિયલ ઇન્ટેન્સિવ રિવિઝન(SIR)ની પ્રક્રિયા હાથ ધરી રહ્યું છે, જેના માટે બૂથ લેવલ ઓફિસર્સ (BLO) ઘરે ઘરે જઈને ફોર્મ ભરી રહ્યા છે. એવામાં ચૂંટણી પંચે SIR માટેની તારીખો લંબાવવાની જાહેરાત કરી છે.
ચૂંટણી પંચે આજે જાહેર કરેલા ઓર્ડરમાં જણાવ્યું હતું કે મતદારોની ડ્રાફ્ટ યાદી જાહેર કરવા માટે વધુ એક અઠવાડિયાનો સમય આપવામાં આવ્યો છે. મતદારોની ડ્રાફ્ટ યાદી જાહેર કરવાની તારીખ અગાઉ 9 ડિસેમ્બર 2025 નક્કી કરવામાં આવી હતી, હવે આ તારીખ 16 ડિસેમ્બર રાખવામાં આવી છે.
આ તરીખ સુધી ભરી શકાશે ફોર્મ:
અગાઉ, SIR માટે ફોર્મ ભરવાની છેલ્લી તારીખ 4 ડિસેમ્બર, 2025 નક્કી કરવામાં આવી હતી, હવે તેને હવે 11 ડિસેમ્બર 2025 સુધી લંબાવવામાં આવી છે. કંટ્રોલ ટેબલ અપડેટ કરવા અને ડ્રાફ્ટ રોલ તૈયાર કરવાની તારીખ 12 ડિસેમ્બરથી 15 ડિસેમ્બર 2025 રાખવમાં આવી છે.
દાવા અને વાંધા દાખલ કરવાનો સમય 16 ડિસેમ્બર 2025 થી 15 જાન્યુઆરી 2026 રાખવામાં આવ્યો છે. 16 ડિસેમ્બર, 2025 થી 7 ફેબ્રુઆરી, 2026 દરમિયાન નોટિસ જાહેર કરવી, સુનાવણી, ચકાસણી અને ચુકાદો આપવો જેવી પ્રક્રિયા હાથ ધરીને દાવાઓ અને વાંધાઓના નિરાકરણની કરવામાં આવશે. મતદારોની સુધારેલી અંતિમ યાદી 14 ફેબ્રુઆરીના રોજ જાહેર કરવામાં આવશે.
વિપક્ષની વિનંતીને ધ્યાનમાં લેવામાં આવી:
નોંધનીય છે કે તાજેતરમાં તૃણમૂલ કોંગ્રેસ અને અન્ય વિપક્ષી પક્ષોના નેતાઓએ મુખ્ય ચૂંટણી કમિશનર જ્ઞાનેશ કુમાર સાથે બેઠક કરી હતી. આ દરમિયાન SIR માટે વધુ સમય આપવા માટે વિનંતી કરવામાં આવી હતી.
આપણ વાંચો: સુપ્રીમ કોર્ટમાં મામલાની તાત્કાલિક સુનાવણી માટેના નિયમો મોટા ફેરફાર! વરિષ્ઠ વકીલોને થશે અસર
